मुंबई: बॉलिवूडमधील 'तान्हाजी: द अनसंग वॉरियर', 'पानिपत: द ग्रेट बेट्रेयल' असो किंवा मराठीतील 'फर्जंद', 'फत्तेशिकस्त' सध्या चित्रपटसृष्टीत चलती आहे ती ऐतिहासिक चित्रपटांची. या ऐतिहासिक चित्रपटांच्या यादीत आता आणखी एक नाव जोडलं जाणार आहे. पावनखिंडीत शत्रूचा मुकाबला करताना धारातिर्थी पडलेले शूर योद्धा बाजीप्रभू देशपांडे यांच्या जीवनावर आधारित चित्रपटाची निर्मिती करण्यात येणार आहे. 'पावन खिंड' असं या चित्रपटाचं नाव असून '...आणि डॉ. काशिनाथ घाणेकर' चित्रपटाचे दिग्दर्शक अभिजीत देशपांडे यांनी चित्रपटाच्या दिग्दर्शनाची धुरा उचलली आहे. सोशल मीडियावर त्यांनी चित्रपटाचं पोस्टर शेअर करत याची घोषणा केली आहे. " ...तोफे आधी, न मरे बाजी सांगा मृत्यूला." ही कथा आहे, बाजी प्रभू देशपांडेंची - आपल्या आयुष्याचा प्रवास मावळतीकडे सुरू झालेला असताना, स्वराज्याच्या उगवत्या सूर्याला - वीर शिवाजीला, त्यांनी दिलेल्या प्राणांच्या अर्घ्याची. आणि.. डॉ. काशीनाथ घाणेकर नंतर सादर करीत आहोत कथा त्या एका रात्रीची, जिने मराठेशाहीचा इतिहास बदलून टाकला. दीपावलीच्या जल्लोषात, पराक्रम आणि बलिदानाच्या त्या रात्रीचं स्मरण ठेवूया. दिवाळी २०२०, वीरश्रीची अमर कहाणी…पावनखिंड अशी पोस्ट त्यांनी फेसबुकवर लिहिली आहे. शिवरायांचे विश्वासू सरदार म्हणून यांची ओळख होती. पन्हाळगडाला शत्रूने वेढा घातलेला असताना छत्रपतींची त्यातून सुटका करण्यासाठी बाजी प्रभूंनी प्राण पणाला लावले. सिद्धी जौहरने पन्हाळ्याला घातलेल्या वेढ्यातून सुटण्यासाठी महाराजांना घेऊन बाजी विशाळगडाकडे निघाले होते. सिद्धीचे सैन्य आपला पाठलाग करत आहे हे समजताच बाजी प्रभूंनी महाजारांना विशाळगडाकडे कूच करायला सांगितली आणि स्वत: घोडखिंडीत सैन्याशी दोन हात करायला थांबले. हजारोंच्या संख्येने आक्रमण करणाऱ्या सैन्याला बाजी प्रभूंनी आणि सोबत असणाऱ्या केवळ २७० मावळ्यांनी पराक्रमाची शर्थ करत थोपवून धरले. महाराज विशाळगडावर सुखरुप पोहोचेपर्यंत त्यांनी तब्बल ६-७ तास ही खिंडी लढवली. महाराज विशाळगडावर सुखरुप पोहोचले याचा इशारा देणारी तोफ धडाडल्यानंतरच त्यांनी प्राण सोडले. स्वराज्यासाठी, रयतेच्या राजासाठी आपल्या प्राणाची आहुती देणाऱ्या या शूरवीराचा पराक्रम मोठ्या पडद्यावर पाहायला मिळणार आहे. येत्या दिवाळीत हा चित्रपट प्रदर्शित होणार असून चित्रपटातील कलाकारांची नावं मात्र अद्याप गुलदस्त्यात आहेत.
