म.टा. प्रतिनिधी, नागपूर गणेश जयंतीनिमित्त नागपूरकरांचे लाडके दैवत असलेल्या टेकडी गणेश मंदिरात आज, मंगळवारी सायंकाळी ५ वाजता शोभायात्रेचे आयोजन करण्यात आले आहे. संपूर्ण दिवसभर विविध धार्मिक उपक्रम होतील. याअंतर्गत दर्शनासाठी येणाऱ्या भाविकांना अकराशे किलो रेवडीचे वाटप करण्यात येणार आहे. श्री अष्टविनायक मित्र मंडळातर्फे ५५१ किलोंच्या लाडूचा महाभोग करण्यात येणार आहे. दरवर्षी तिळी चतुर्थीला टेकडी गणपतीचे दर्शन घेणाऱ्यांची संख्या लाखोंच्या घरात आहे. त्यानिमित्त आयोजित यात्रा संकष्टी चतुर्थीला सुरू झाली. गणेशजयंतीला यात्रेचा समारोप होईल. वर्षागणिक वाढणाऱ्या संख्येचा विचार करता दर्शनासाठी विशेष व्यवस्था करण्यात आली आहे. मानस चौक ते जयस्तंभ चौकादरम्यान पोलिसांचा चोख बंदोबस्त ठेवण्यात येणार आहे. भाविकांसाठी आठ ई-रिक्षा आणि व्हीलचेअरची व्यवस्था करण्यात आली आहे. यादिवशी मध्य प्रदेश परिवहन व्यवस्था बंद ठेवण्यात आली असून, त्याठिकाणी जोडे-चप्पल आणि पिण्याच्या पाण्याची व्यवस्था करण्यात आली आहे. सुरक्षेच्या दृष्टिकोनातून सीसीटीव्ही कॅमेरे, क्लोज सर्किट टीव्ही कॅमेरे आणि एलसीडी स्क्रीन लावण्यात आले आहेत. शिवाय, सीसीटीव्ही नियंत्रण कक्ष, पोलिस चौकी आणि उद्घोषणा प्रणालीद्वारे वेळोवेळी सूचना देण्यात येतील. रुग्णवाहिका आणि अग्निशमन बंब आदी सुविधा उपलब्ध राहणार आहे. दरम्यान ‘श्रीं’वर हेलिकॉप्टरद्वारे पुष्पवर्षाव करण्यात येणार आहे. यात्रेच्या यशस्वितेसाठी अध्यक्ष लखीचंद ढोबळे, उपाध्यक्ष माधव कोहळे, सचिव संजय जोगळेकर, सहसचिव निशिकांत सगदेव, कोषाध्यक्ष के. सी. गांधी आदी परिश्रम घेत आहेत. सुशोभित रथ, सनई अन् बॅण्ड शोभायात्रेत गणेश मंदिर भक्त, अथर्वशीर्ष मंडळी, सनई वादन, बॅण्ड, ‘श्रीं’चा सुशोभित रथ राहणार आहे. गणेश मंदिर ते मानस चौक, अन्सारी मार्ग, राजस्थानी महिला मंडळ, भोंडा देऊळ, पटवर्धन हायस्कूल, लोखंडी पूल, मॉडेल हायस्कूल अस शोभायात्रेचा मार्ग राहील. पोद्दारेश्वर मंदिराचे सुरेश अग्रवाल यांच्या मार्गदर्शनात संस्थेचे माजी प्रमुख पुजारी मनोहर कुळकर्णी यांच्या हस्ते शोभायात्रेचे उद्घाटन होईल.
