: अबु धाबी : डेक्कन ग्लॅडिएटर्सने दिल्ली बुल्सचा पराभव करत अबू धाबी टी-१० लीगचे विजेतेपद जिंकले. अंतिम सामन्यात डेक्कनच्या विजयाचा हिरो ठरलेल्या आंद्रे रसेलने ३२ चेंडूत नाबाद ९० धावांची तुफानी खेळी केली. त्याने सलामीवीर कॅडमोर (५९) सोबत पहिल्या विकेटसाठी नाबाद १५९ धावांची भागीदारी केली. फलंदाजीत धडाकेबाज खेळी केल्यानंतर आंद्रे रसेलने गोलंदाजी करतानाही एक विकेट घेतली. त्याने रोमारियो शेफर्डचा त्रिफळा उडवला. रसेलने २ षटकांत २५ धावा केल्या. या शानदार कामगिरीसाठी त्याला अंतिम सामन्यात 'सामनावीर' म्हणूनही गौरविण्यात आले. संपूर्ण लीगमध्ये २१ विकेट घेणाऱ्या श्रीलंकेचा स्टार गोलंदाज वानिंदू हसरंगाला 'प्लेयर ऑफ द सिरीज' म्हणून गौरवण्यात आले. प्रथम फलंदाजी करताना डेक्कन संघाने निर्धारित १० षटकात बिनबाद १५९ धावा केल्या. रसेल आणि कॅडमोर यांनी नाबाद अर्धशतकी खेळी केली. लक्ष्याचा पाठलाग करण्यासाठी मैदानात उतरलेल्या दिल्ली बुल्स संघाने चांगली सुरुवात केली होती, पण २४ धावांवर ओडियन स्मिथने दिल्लीला सलग दोन धक्के दिले. यानंतर २९ चेंडूत ४२ धावा करणाऱ्या चंद्रपॉल हेमराजने एका बाजूने डाव सावरला होता, पण दुसऱ्या बाजूकडून त्याला साथ मिळाली नाही. आणि दिल्ली बुल्स संघ विजेतेपदापासून ५६ धावा दूर राहिला. निर्धारित १० षटकांत सनी लिओनच्या दिल्ली संघाला ७ गड्यांच्या मोबदल्यात १०३ धावाच करता आल्या. तिसऱ्या क्रमांकाचा सामना बरोबरीत सुटला गुणतालिकेत अव्वलस्थानी असलेल्या अबुधाबी संघाला तिसरे स्थान मिळाले, पण घरच्या मैदानावर तिसऱ्या क्रमांकासाठी झालेला बांगला टायगर्ससोबतचा सामना बरोबरीत सुटला. प्रथम फलंदाजी करताना अबुधाबी संघाने कॉलिन इंग्रामच्या ४१ धावांच्या जोरावर ५ बाद ९८ धावा केल्या. प्रत्युत्तरात बांगलादेशचा संघ ६ बाद ९८ धावाच करू शकला. त्यामुळे हा सामना बरोबरीत सुटला. अबुधाबीने १० पैकी ७ सामने जिंकून १४ गुणांसह गुणतालिकेत तिसरे स्थान पटकावले आहे. अबुधाबी संघाने एलिमिनेटर सामन्यात बांगला टायगर्सचा ७ गडी राखून पराभव केला होता.
