कल्पेशराज कुबल kalpeshraj.kubal@timesgroup.com ज्यांनी '' या सिनेमाचा ट्रेलर पाहिला आहे, त्यांना सिनेमाच्या कथानकाचा काहीसा अंदाज आला असेल. तो हिंदीतील 'ओ माय गॉड' च्या जवळ जाणारा आहे. कारण दोन्ही सिनेमांचे कथानक वेगळे असले तरी सिनेमाच्या गोष्टीची संकल्पना सारखीच वाटते. आता 'आप्पा आणि बाप्पा' या सिनेमाची तुलना 'ओ माय गॉड'शी होणार नाही. पण, तरी दोघांचा धागा आहे तो 'देव'. कथनायकाला दिसणारा देव. ही गोष्ट आहे 'अप्पा आणि बाप्पा'ची. आप्पा म्हणजे गोविंद कुलकर्णी (); पुण्यात राहणाऱ्या या मध्यमवर्गीय सद्गृहस्थाचे वडील रमाकांत कुलकर्णी () उतारवयात आहेत. सण-उत्सव आणि अन्नदान, देवाधिकाचे करणारी ही वृद्ध व्यक्ती. जग सोडण्यापूर्वी त्यांना आपल्या घरी मोठी सत्यनारायणाची पूजा घालून शंभरएक मंडळींना जेवायला घालून गणेशोत्सव मोठ्या दिमाखात साजरा करायचा आहे. कुलकर्णी कुटुंबीयांची मोठ्या खर्चाची ऐपत नसते (असे कथानकात दाखवण्यात आले असले तरी त्यांचे पुण्यातील राहते घर किंबहुना वाडा प्रशस्त आणि राहणीमान उत्तम आहे). रमाकांत कुलकर्णी यांच्या इच्छेमुळे घरात हजारो रुपये खर्च करून गणपतीसाठी सजावट केली जाते. विभागातील सार्वजनिक गणेशोत्सवात हजारोंची जाहिरात दिली जाते. पूजा महाप्रसादाचा बेत रंगतो. या सगळ्याचा खर्च उधारीवर करत ही उधारीची रक्कम पार लाखाच्या वर जाते. आता ही उधारीची रक्कम फेडण्यासाठी कुलकर्णी कुटुंबीयांकडे एकच पर्याय असतो; तो म्हणजे आप्पाच्या म्हणजेच गोविंद कुलकर्णी यांच्या आजोबांनी केलेली वीस लाखांची मुदत ठेव (फिक्स्ड डिपॉझिट) वापरणे. पण बँक एफडीचे पैसे द्यायला टाळाटाळ करते. या दुष्टचक्रातून आप्पा बाहेर काढण्यासाठी साक्षात 'बाप्पा' उर्फ विनायक ()च अवतरतो. हा बाप्पा केवळ आप्पालाच दिसत असतो; त्याच्याशी बोलत असतो. आता हा बाप्पा अर्थात विघ्नहर्ता आप्पा या विघ्नातून बाहेर काढतो का? आप्पाने बाप्पाला वेठीस का धरले आहे? याचे उत्तर सिनेमाच्या उत्तरार्धात दडलेले आहे. सुबोध भावे आणि भरत जाधवच्या चाहत्यांसाठी हा सिनेमा मनोरंजनाची मेजवानी असेल. प्रासंगिक विनोद आणि कलाकारांची प्रसंगांमधील नाट्यमयता आपल्याला हसवते. सिनेमा बराच लांबला असला तरी काही प्रमाणात तो आपले मनोरंजन करण्यात यशस्वीही झालाय आणि सामाजिक प्रबोधन देखील त्याने केले आहे. मुळात सिनेमाची मूळ कथाच काल्पनिक आणि बाप्पा अवतारण्याची असल्यामुळे सर्वच कलाकारांचा अभिनय हा भडक झाला आहे. दिग्दर्शक गरीमा धीर आणि जलज धीर यांनी कथानकाच्या जीवाचा विचार न करता तो लांबच लांब ताणल्याने दिग्दर्शकाची पटकथेवरील पकड सुटली आहे. प्रेक्षकांना सिनेमाच्या पटकथेत खेळवण्याच्या नादात पुरती सिनेमाची मांडणी विस्कटली असून दिग्दर्शकीय नजर कमी पडली आहे. आजोबांच्या भूमिकेत असलेल्या दिलीप प्रभावळकर यांनी नेहमीप्रमाणे आपल्या भूमिकेला न्याय देण्याचा उत्तम प्रयत्न केला आहे. परंतु विस्कटलेली पटकथा काही कलाकरांना सावरता आलेली नाही. सिनेमाला अधिक कात्री लावून पटकथेची बांधणी केली असती तर सिनेमाचा परिणाम काही वेगळा असला असता. सिनेमातील गाणी शाब्दिकदृष्ट्या बोध देणारी आहेत, पण सांगीतिकदृष्ट्या परिणामकारक नाहीत. सूर्या मिश्रा यांचे छयाचित्रण अनेक प्रसंगांमध्ये सृजनशील आहे. एकंदर सिनेमा बघण्याजोगा झाला आहे. सिनेमा : आप्पा आणि बाप्पा निर्माते/दिग्दर्शक : गरीमा धीर, जलज धीर कलाकार : दिलीप प्रभावळकर, भरत जाधव, सुबोध भावे, , लेखक : अश्वनी धीर व अरविंद जगताप छायाचित्रण : सूर्या मिश्रा संगीत : सारंग कुलकर्णी, सायली खरे, अभंग रीपोस्ट दर्जा : दोन स्टार
