पर्थ: न्यूझीलंडविरुद्धच्या पहिल्या कसोटी दुसऱ्याच दिवशी ऑस्ट्रेलियाने आपले पारडे जड केले आहे. जलद गोलंदाज मिचेल स्टार्क (Mitchell Starc) च्या भेदक गोलंदाजीमुळे न्यूझीलंडचा संघ अडचणीत आला आहे. या सामन्यातील एका कॅचची चर्चा सध्या क्रिकेट विश्वात सुरु आहे. अवघ्या चार सेंकदाचा हा व्हिडिओ सोशल मीडियावर व्हायरल होत आहे. ऑस्ट्रेलिया आणि न्यूझीलंड () यांच्यात डे-नाईट कसोटी सामना सुरु आहे. ऑस्ट्रेलियाने मार्नस लाबुशेनच्या शतकाच्या जोरावर पहिल्या डावात ४१६ धावा केल्या. ऑस्ट्रेलियाच्या पहिल्या डावाला उत्तर देताना न्यूझीलंडचा डाव गडगडला. त्यांचे आघाडीचे तीन फलंदाज २० धावातच बाद झाले. दुसऱ्या दिवसाचा खेळ संपला तेव्हा न्यूझीलंडची अवस्था ५ बाद १०९ अशी होती. कर्णधार केन विल्यमसन आणि जो रॉस टेलर यांनी न्यूझीलंडचा डाव सावरण्याचा प्रयत्न केला. पण मिचेल स्टार्कने विल्यमसनला बाद करत न्यूझीलंडला धक्का दिला. दुसऱ्या दिवसाच्या खेळात मिचेल स्टार्कच्या गोलंदाजीवर स्टिव्ह स्मिथ () ने हवेत झेप घेत एक शानदार झेल घेत केन विल्यमसन () ला बाद केले. या कॅचचा व्हिडिओ सोशल मीडियावर व्हायरल होत आहे. स्टार्कच्या एका चेंडूने विल्यमसनच्या बॅटला स्पर्श केला. तेव्हा स्लीपमध्ये तिसऱ्या क्रमांकावर उभ्या असलेल्या स्मिथने डाव्या बाजूला हवेत झेप घेत कॅच घेतला. अवघ्या ४ सेंकदात स्मिथने विल्यमसनला पॅव्हेलियनचा रस्ता दाखवला. स्मिथचा हा कॅच अत्यंत महत्त्वाचा ठरला. कारण न्यूझीलंडचे २० धावात ३ गडी बाद झाले होते. विल्यमसन आणि टेलर संघाचा डाव सावरत आहेत, असे वाटत असतानाच स्मिथने शानदार कॅच घेत आणखी एक धक्का दिला. विल्यमसन-टेलर जोडीने तिसऱ्या विकेटसाठी ७६ धावा जोडल्या होत्या. दुसऱ्या दिवसाचा खेळ संपला तेव्हा ऑस्टेलियाकडे ३०७ धावांची आघाडी होती. स्मिथचा हा कॅच इतका शानदार होता की विल्यमसनला विश्वासच बसला नाही. बाद झाल्यानंतर तो काही वेळ मैदानातच थांबला. सोशल मीडियावर क्रिकेट चाहत्यांमध्ये हा व्हिडिओ व्हायरल होत आहे. एका युझरने स्मिथ केवळ शानदार फलंदाज नाही तर सर्वोत्तम फिल्डर देखील असल्याचे म्हटले आहे. तर काहींनी ट्विटवर या व्हिडिओच्या खाली भारताचा माजी कर्णधार महेंद्र सिंग धोनीने घेतलेल्या अशाच प्रकारच्या कॅचचा व्हिडिओ शेअर केला आहे.
