मुंबई- सिनेमात इन्टिमेट सीन देणं ही फार सामान्य गोष्ट झाली आहे. कथेच्या गरजेनुसार सर्वच अभिनेत्यांनी इन्टिमेट सीन दिले आहेत. पण या सगळ्यात असेही काही स्टार आहेत ज्यांना इन्टिमेट सीन देताना सर्वात जास्त टेन्शन येतं. बॉलिवूड अभिनेता आणि दाक्षिणात्य स्टार दुलकर सलमानने असे सीन शूट करताना त्याचे हात पाय कापत असल्याचं मान्य केलं. तो म्हणाला की, कॅमेऱ्यासमोर आपल्या मनातली धाकधूक तो मोठ्या शिताफीने लपवतो. नुकताच नेहा धुपियाच्या ‘नो फिल्टर नेहा’ शोमध्ये गेला होता. या मुलाखतीत दुलकरने स्वतःशी निगडीत अनेक रंजक गोष्टी सांगितल्या. तो म्हणाला की, इंटिमेट सीनवेळी तो फार अस्वस्थ होतो. एवढंच नाही तर त्याचे हात- पायही कापू लागतात. सलमान म्हणाला की, ‘माझी कोस्टर काय विचार करत असेल याचा मी नेहमी विचार करतो. मला यातून बाहेर पडायचं आहे हे तिला कळतं असेल का... मग वाटतं मी पूर्ण नग्न आहे आणि ती मी काय आहे ते पाहू शकते.. असे एक ना अनेक विचार माझ्या मनात सतत येत राहतात.’ दुलकर पुढे म्हणाला की, ‘इन्टिमेट सीन करताना मी अनेकदा माझे हात अभिनेत्रीच्या केसांच्या मागे लपवतो. खऱ्या आयुष्यात प्रेम व्यक्त करणं सोप्पं असतं. कारण समोरच्या व्यक्तिला मी ओळखत असतो. पण कॅमेऱ्या समोर शूट करणं तेवढंच अवघड असतं.’ यावेळी सलमानने सोनमसोबतच्या इन्टिमेट सीनबद्दलचाही उल्लेख केला. तो म्हणाला ‘सोनम कपूर या सर्वांमध्ये फार क्यूट होती.’ दुलकर सलमान आणि सोनम कपूरने ‘द झोया फॅक्टर’ सिनेमात एकत्र काम केलं. या सिनेमात सलमानने एका क्रिकेटरची व्यक्तिरेखा साकारली होती. सिनेमातील दोघांच्या रोमान्सची चर्चा बी- टाउनमध्ये झाली तर बॉक्स ऑफिसवर 'द झोया फॅक्टर' सिनेमा दणदणीत आपटला होता.
