
कोलकाता : पश्चिम बंगालची राजधानी कोलकातामध्ये एका भाजी विक्रेत्याला लॉटरीमध्ये एक कोटी रुपये मिळाले. कोलकातामधील डमडम भागात या सादिक यांचं भाजीचं दुकान आहे. नव्या वर्षाच्या मुहूर्तावर भाजी विक्रेत्याने नागालँड तिकीट खरेदी केलं. लॉटरी जाहीर झाल्यानंतर तुम्हाला लॉटरी लागलेली नाही, असं त्यांना काही लोकांनी सांगितलं. यामुळे नाराज झालेल्या सादिकने तिकीट कचऱ्यात फेकून दिले. पण नंतर यातीलच एका तिकिटावर एक कोटी रुपयांची लॉटरी लागली असल्याचं लक्षात आलं. सादिक यांनी नवीन वर्षाच्या पहिल्याच दिवशी पत्नी अमिनासह पाच लॉटरी तिकीट खरेदी केले. २ जानेवारीला जेव्हा लॉटरी जाहीर झाली, तेव्हा तुम्हाला लॉटरी लागलेली नाही, असं काही जणांनी सादिक यांना सांगितलं. सादिक यांना तोपर्यंत तिकीट कचऱ्यात फेकून दिले होते. पण एका तिकिटावर एक कोटी रुपयांची लॉटरी लागलेली असल्याचं नंतर समजलं. सादिक यांनी थेट घर गाठलं आणि पत्नीसह मिळून कचऱ्यात फेकून दिलेलं तिकीट शोधलं. दोघांनीही तिकीट शोधून काढलं आणि यानंतर आनंद गगनात मावेनासा झाला. विशेष म्हणजे सादिक यांनी जे तिकीट खरेदी केले होते, त्यातील एकावर १ कोटी रुपये आणि इतर चार तिकिटांवर १-१ लाख रुपये बक्षिस जाहीर झालं होतं. लॉटरीच्या या तिकिटामुळे सादिक यांचं आयुष्य बदललं आहे. सादिक यांनी आपल्या मुलांसाठी एक एसयूव्ही बूक केली आहे, अशी माहिती पत्नी अमिनाने दिली. यानंतर मुलांना आता चांगल्या शाळेत शिकण्यासाठी पाठवणार आहेत. सादिक यांचं कुटुंब या लॉटरीमुळे सध्या प्रचंड खुश आहे. येत्या दोन ते तीन महिन्यात ही रक्कम सादिक यांना मिळणार आहे.