मुंबई: दिल्लीतील जवाहरलाल नेहरू विद्यापीठात बुरखाधारी गुंडांनी विद्यार्थ्यांवर केलेल्या भ्याड हल्ल्याचे तीव्र पडसाद गेल्या तीन दिवसांपासून देशभरात उमटत आहेत. देशातील विविध शैक्षणिक संस्थांमधील विद्यार्थी या हल्ल्याचा निषेध करण्यासाठी रस्त्यावर उतरले असून या आंदोलनाला सेलिब्रिटींचाही मोठा पाठिंबा मिळत आहे. बॉलिवूडमधील दीपिका पदुकोण, सोनम कपूर, स्वरा भास्कर, अनुराग कश्यप यासह अनेक सेलिब्रिटी या आंदोलनाला पाठिंबा देण्यासाठी पुढे आले असून मराठी सेलिब्रिटींनीही त्यात उडी घेतली आहे. अभिनेत्री सोनाली कुलकर्णीने ट्विटरच्या माध्यमातून विद्यार्थ्यांवरील बळजबरीचा समाचार घेतला आहे. केंद्र सरकारने नागरिकत्व कायदा मंजूर करून अन्य देशांतील भारतीय अल्पसंख्याकांना भारतीय नागरिकत्वासाठी दरवाजे खुले केले आहेत. त्यावरच बोट ठेवत सोनालीने सरकारवर निशाणा साधला आहे. 'देशातील विद्यार्थी आपल्याच देशात असुरक्षित झाला आहे आणि अन्य देशांतील अल्पसंख्याकांना आपण संरक्षण द्यायला निघाले आहेत' असा सणसणीत टोला सोनालीने ट्विटरच्या माध्यमातून सरकारवर लगावला आहे. आंदोलनाला वाढता पाठिंबा दिग्दर्शक विशाल भारद्वाज, अनुराग कश्यप, अनुभव सिन्हा, झोया अख्तर, रीमा कागती, अभिनेत्री दीपिका पदुकोण, तापसी पन्नू, दिया मिर्झा, गौहर खान, श्वेता त्रिपाठी, अली फजल, राहुल बोस अशा बॉलिवूडमधील अनेक सेलिब्रिटींनी या हल्ल्याच्या निषेध नोंदवत आंदोलनाला पाठिंबा दिला आहे. शबाना आझमी, वरूण धवन, आलिया भट, अनिल कपूर, सोनम कपूर, रितेश देशमुख, त्याची पत्नी व अभिनेत्री जेनेलिया देशमुख या सेलिब्रिटींनी सोशल मीडियाच्या माध्यमातून आपल्या तीव्र भावना व्यक्त करत विद्यार्थ्यांवरील हल्ल्याचा निषेध केला आहे. नेमकं काय घडलं? दिल्लीतील जवाहरलाल नेहरु विद्यापीठातील हॉस्टेलमध्ये रविवारी सायंकाळी बुरखाधारी हल्लेखोरांनी धुडघूस घातला होता. लोखंडी रॉट व लाठ्या-काठ्यांसह आलेल्या हल्लेखोरांनी हॉस्टेलवर हल्ला चढवत विद्यार्थ्यांना बेदम मारहाण केली होती. या हल्ल्यात ३४ विद्यार्थी जखमी झाले होते. सर्व जखमींना उपचारांसाठी एम्समध्ये दाखल करण्यात आले होते. या हल्ल्याचे देशभरात पडसाद उमटत आहेत. रविवारी रात्रीपासूनच दिल्ली, मुंबई, पुण्यासह विविध ठिकाणी रस्त्यावर उतरून विद्यार्थी निदर्शने करत आहेत.
