औरंगाबाद: गाडीला जागा न दिल्याने झालेल्या वादातून १० ते १५ जणांच्या टोळक्याने आणि वाहकाला बेदम मारहाण केल्याची धक्कादायक घटना औरंगाबादमध्ये घडली आहे. या टोळक्याने भररस्त्यावरच एसटी थांबवून लाठ्याकाठ्यांनी एसटीच्या काचा फोडत चालक आणि वाहकांना बेदम चोप दिला. त्यामुळे शहरात तणाव निर्माण झाला असून या मारहाणीप्रकरणी दोघांना अटक करण्यात आली आहे. औरंगाबादच्या कन्नड येथे ही धक्कादायक घटना घडली. शिरपूर आगाराची ही बस एका गाडीला ओव्हरटेक करून पुढे गेली. शिवाय या गाडीला पुढे जाण्यासाठी जागा दिली नाही. त्यामुळे या गाडीतील तरुण संतप्त झाले आणि त्यांनी गाडी थांबवून एसटी चालक आणि वाहकांना बेदम मारहाण केली. सुमारे १० ते १५ तरुणांनी लाठ्याकाठ्या घेऊन बसचालक आणि वाहकांना बेदम मारहाण करत एसटीच्या काचा फोडल्या. भररस्त्यावरच हा प्रकार घडल्याने वाहतुकीची कोंडी झाली होती. तसेच अचानक झालेल्या या हल्ल्यामुळे या परिसरात तणाव निर्माण झाला होता. काही तरूण एसटी चालकाला बेदम मारहाण करत असल्याचं पाहून पादचारीही घाबरून गेले होते. तब्बल अर्धा ते पाऊण तास हे मारहाण नाट्य सुरू होतं. दरम्यान, या घटनेची माहिती मिळताच पोलिसांनी तात्काळ घटनास्थळी धाव घेतली. त्यामुळे हल्लेखोरांनी तेथून पोबारा केला. मात्र यापैकी दोघाजणांना पकडण्यात पोलिसांना यश आलं आहे. पोलिसांनी या दोघांनाही अटक केली असून १० ते १५ जणांविरोधात गुन्हा दाखल केला आहे. याप्रकरणी अधिक तपास सुरू आहे. बसचालकाला मारहाण आणि बसची तोडफोड होत असताना बसमधील प्रवाशांनी या घटनेचा व्हिडिओ मोबाईलमध्ये शूट केला असून हा व्हिडिओ सोशल मीडियावर व्हायरल झाला आहे. मात्र, भररस्त्यात झालेल्या या प्रकारामुळे कन्नड परिसरात प्रचंड भीतीचं वातावरण निर्माण झालं आहे.
