मुंबई : करोनाचा प्रकोप वाढल्याने धास्तावलेल्या गुंतवणूकदारांनी सोमवारी शेअर बाजारात जोरदार विक्री केली आहे. अवघ्या अर्धा तासात सेन्सेक्स ४५० अंकांनी कोसळला तर निफ्टीत १२० अंकांची घसरण झाली आहे. या पडझडीत गुंतवणूकदारांना किमान एक लाख कोटींचे नुकसान झाले आहे. सध्या सेन्सेक्स ४१९ अंकांच्या घसरणसीसह ३४७५१ अंकांवर आहे. तर निफ्टी १२४ अंकांनी घसरला असून १०२५८ अंकांवर ट्रेड करत आहे. अमेरिका आणि आशियातील नकारात्मक संकेतांचा प्रभाव सध्या भारतीय बाजारांवर आहे. शुक्रवारी यामुळे अमेरिकेचा प्रमुख निर्देशांक असलेल्या डाउ जोन्समध्ये ७३० अंकांची घसरण झाली. नॅसडॅक आणि एस अँड पी ५०० निर्देशांक अनुक्रमे २.६ टक्के आणि २.४ टक्के घसरले. त्याची प्रतिक्रिया आज आशियातील प्रमुख बाजारांमध्ये उमटली. सोमवारी जपान , दक्षिण कोरिया, सिंगापूरमधील शेअर निर्देशांकात घसरण झाली आहे. जपानचा निक्केई १.५ टक्के तर दक्षिण कोरियाचा शेअर बाजार १.४ टक्क्यांनी घसरला आहे. त्याशिवाय सिंगापूर एक्सचेंजमध्ये ७३ अंकांची घसरण झाली आहे. आज सकाळी बाजार उघडताच सेन्सेक्स २७० अंकांनी घसरला होता. तर निफ्टीने १०३०० ची पातळी तोडली. आज बँका, वित्त संस्था, ऑटो, या क्षेत्रात विक्रीचा मारा सुरु आहे. सध्या एसबीआय, आयसीआयसीआय बँक, कोटक बँक ऍक्सिस बँक, बजाज ऑटो, बजाज फिनसर्व्ह, टाटा स्टील,अल्ट्राटेक सिमेंट, पॉवरग्रीड, महिंद्रा अँड महिंद्रा, एनटीपीसी, ओएनजीसी, मारुती, टीसीएस, इन्फोसिस आदी प्रमुख शेअरमध्ये घसरण झाली आहे. आयटीसी, एशियन पेंट्स, हिंदुस्थान युनिलिव्हर, टायटन, सन फार्मा, फ्युचर रिटेल, इंडियन ओव्हरसीज बँक, हे शेअर तेजीत आहेत. एचडीएफसी आणि एचडीएफसी बँक या दोन शेअरनी सेन्सेक्सच्या घसरणीत मोठा हातभार लावला आहे. देशात एकूण करोनाबाधित रुग्णांपैकी एकूण १६ हजार ४७५ रुग्णांचा झाला मृत्यू झाला असल्याची माहिती आरोग्य मंत्रालयाने दिली आहे. देशभरात गेल्या २४ तासांमध्ये आढळले करोनाचे १९,४५९ नवे रुग्ण आढळून आले. मागील २४ तासांत झाला एकूण ३८० करोनाबाधितांचा मृत्यू झाला आहे. सरत्या आठवड्यात शुक्रवारी निर्देशांक सावरले होते. आठवड्याचा विचार करता सेन्सेक्स ४३९ अंकांनी वधारला होता. निफ्टीने १३८ अंकांची कमाई केली होती. यादरम्यान निर्देशांकाला नफेखोरीची झळ देखील बसली होती. दरम्यान मागील आठवड्यात अमेरिका आणि चीनमधील वाढता तणाव तसेच गलवान खोऱ्यातील भारत आणि चिनी लष्करात झालेल्या तणावाचे पडसाद बाजारावर उमटले होते. देशातील करोना रुग्णांची संख्या झपाट्याने वाढत आहे. त्यामुळे देशासमोर नवे संकट उभे राहिले आहे. त्यातच स्टॅंडर्ड अँड पुअर्स या संस्थेने मानांकन कपातीचा दिलेला इशारा या आठवड्यात शेअर बाजाराची दिशा ठरवणार आहे.
