मुंबई : आज बाजार उघडताच सेन्सेक्स आणि निफ्टीवर विक्रीचा दबाव दिसून आला. सेन्सेक्समध्ये २३० अंकांच्या घसरणीसह व्यवहारांना सुरुवात झाली. देशात करोना रुग्णांची विक्रमी वाढ होत आहे. करोना बाधितांची संख्या १४ लाखांवर गेली असून ३४ हजार नागरिकांनी आपला जीव गमावला आहे. करोना लसींबाबत अद्याप ठोस माहिती समोर न आल्याने गुंतवणूकदारांनी आज शेअर्सची विक्री करून नफा वसुलीला प्राध्यान दिल्याने शेअर दलालांनी सांगितले. अर्थव्यवस्थेला करोनाचा जबर फटका बसला आहे. करोनाची साथ रोखण्यासाठी केंद्र सरकारने देशात जवळपास ८५ दिवस कठोर लॉकडाउन ठेवला होता. मात्र त्यानंतर करोना रुग्णवाढीचा आलेख वरती जात आहे. लॉकडाउनमध्ये उद्योगाचे मोठे नुकसान झाले आहे. त्यामुळे यंदा विकासदर नीचांकी पातळी गाठणार असल्याचे अंदाज जाणकारांनी व्यक्त केले आहेत. सध्या सेन्सेक्स ३७९ अंकांच्या घसरणीसह ३७२२७ अंकांवर ट्रेड करत आहे. निफ्टी १०९ अंकांच्या घसरणीसह १०९७५ अंकांवर ट्रेड करत आहे. आज बाजारावर वाहन विक्रीच्या आकडेवारीची छाप दिसून आली. जुलैमधील वाहन विक्री काही प्रमाणात वाढली. त्यामुळे ऑटो शेअर्सला मागणी होती. याशिवाय आज काही कंपन्यांचे तिमाही निकाल जाहीर होणार आहेत. त्यावर गुंतवणूकदारांचे लक्ष असेल. सध्या बाजारात टाटा मोटर्स, एसबीआय, येस बँक, अशोक लेलँड, कॅडिला हेल्थकेअर आदी शेअर तेजीत आहेत. रिलायन्स, एचडीएफसी बँक, कोटक बँक, टीसीएस,इन्फोसिस , एक्सिस बँक, एचडीएफसी, टीसीएस, एल अँड टी या शेअरमध्ये घसरण झाली आहे. शुक्रवारी सेन्सेक्समध्ये १२९ अंकांची घसरण झाली होती. शेअर बाजाराच्या माहितीनुसार शुक्रवारी परकी गुंतवणूकदारांनी बाजारात ९५९ कोटींची विक्री केली. तर स्थानिक संस्थात्मक गुंतवणूकदारांनी ४४२.७३ कोटींची खरेदी केली. सेन्सेक्स, निफ्टीमध्ये गुरुवारी अनुक्रमे ३३५ व १०० अंकांची घसरण झाली होती. शुक्रवारीही हा कल कायम राहिला. बाजाराचे नेतृत्व करणाऱ्या रिलायन्स इंडस्ट्रीजचे जूनअखेरच्या तिमाहीचे आर्थिक निकाल गुरुवारी उशिरा जाहीर करण्यात आले होते. जूनअखेरच्या तिमाहीत रिलायन्सने १३,२४८ कोटी रुपये विक्रमी नफ्याची नोंद केली. यामुळे या समभागाला शुक्रवारी मागणी असेल, असा अंदाज व्यक्त होत होता. परंतु, आधीच वधारलेल्या या समभागांची विक्री करून नफेखोरी करण्याचा पर्याय गुंतवणूकदारांनी स्वीकारला. यामुळे या समभागांची मोठ्या प्रमाणावर विक्री झाली आणि त्याचे मूल्य दोन टक्क्यांनी घसरले होते.
