मुंबई : करोनाची साथ पुन्हा वाढू लागल्याने भांडवली बाजार आणि कमॉडिटी बाजारात पडसाद उमटू लागले आहेत. सोने दरात सलग दुसऱ्या दिवशी घसरण झाली आहे. आज गुरुवारी मल्टी कमॉडिटी एक्सचेंजवर सोने दरात ४३ रुपयांची घसरण झाली आहे. सोन्याचा भाव प्रती १० ग्रॅम ५०४५२ रुपये आहे. चांदीच्या भावात एक किलोमागे ११६ रुपयांची वाढ झाली आहे. एक किलो चांदीचा भाव ६०२५४ रुपये आहे. जागतिक बाजारातील अनिश्चितता आणि करोनाची दुसरी लाट यामुळे सोने आणि चांदीमध्ये बुधवारी मोठी घसरण झाली. देशांतर्गत बाजारात सोने ४५० रुपयांनी स्वस्त झाले होते. तर चांदीच्या दरात २०८० रुपयांची घसरण झाली होती. आज मात्र दोन्ही धातू काही प्रमाणात सावरले. जागतिक बाजारात डॉलरचे मूल्य वधारले आहेत. स्पॉट गोल्डचा भाव सध्या १८७७.८३ डॉलर प्रती औंस आहे. त्याआधीच्या सत्रात सोने २ टक्क्यांनी स्वस्त झाले होते. चांदी मात्र ०.१ टक्क्यांनी वधारले असून २३.४३ डॉलर प्रती औंस झाला आहे. युरोपीयन देशांमध्ये करोनाच्या दुसऱ्या लाटेने कहर करण्यास सुरुवात केल्याचे चित्र आहे. मागील काही दिवसांमध्ये ब्रिटन, फ्रान्ससह इतर देशांमध्ये करोनाबाधितांची संख्या वाढू लागली आहे. फ्रान्समध्ये एकाच दिवसात ३३ हजार ४१७ जणांना करोनाची बाधा झाली असल्याचे समोर आले आहे. तर, ५२३ जणांच्या मृत्यूची नोंद करण्यात आली आहे. अमेरिकी डॉलरचे मूल्य कमकुवत झाल्याने सोन्याच्या दरांना मागील व्यापारी सत्रात आधार मिळाला. अतिरिक्त मदतीच्या अतिरिक्त चिंतेने गुंतवणूदार सोन्याकडे आकर्षित झाले. एंजल ब्रोकिंग लिमिटेडचे गैर कृषी वायदा व चलन संशोधन उपाध्यक्ष प्रथमेश माल्या यांनी सांगितले की कोव्हिड-१९ च्या दुस-या लाटेच्या चिंतेत वाढ झाल्याने बुधवारी सोने ०.२७ टक्क्यांनी वधारले व १९०६.८ डॉलर प्रती औंसवर स्थिरावले. कमकुवत अमेरिकी डॉलरमुळे मौल्यवान धातूला आधार मिळाला. अमेरिकेकडून अतिरिक्त आर्थिक मदत मिळण्याचे स्पष्ट चिन्ह दिसत नसल्यामुळे पिवळ्या धातूतील नफा मर्यादित राहिला. तरीही व्हाइट हाऊसच्या अधिका-यांशी याबाबतीत चर्चेबाबत हाऊस स्पीकर नँसी पेलोसी आशावादी आहेत. नोव्हेंबर २०२० पूर्वीच्या निवडणुकीपूर्वी ही मदत मिळेल, अशी आशा आहे. तरीही या मदतीच्या अनिश्चिततेमुळे डॉलरला आधार मिळाला. परिणामी सोन्याचे दर घसरू शकतात. आजच्या सत्रात एमसीएक्सवर सोन्याचे दर कमी होऊ शकतात. goodreturns.in या वेबसाईटनुसार गुरुवारी मुंबईत २२ कॅरेट सोन्याचा भाव प्रती १० ग्रॅम ४९८६० रुपये आहे. तर २४ कॅरेटचा भाव ५०८६० रुपये आहे. दिल्लीत २२ कॅरेटचा भाव ४९५१० रुपये असून २४ कॅरेटचा भाव ५३०१० रुपये आहे. कोलकात्यात ग्राहकांना २२ कॅरेट सोने खरेदीसाठी ४९११० रुपये मोजावे लागत आहेत. तर २४ कॅरेटचा भाव ५२७२० रुपये आहे. चेन्नईत २२ कॅरेट सोने प्रती १० ग्रॅमसाठी ४७६८० रुपये आहे. २४ कॅरेटसाठी तो ५२००० रुपये आहे.
