वॉशिंग्टन: अमेरिकेत मतमोजणी सुरू असून अद्यापही निकाल जाहीर झाले नाहीत. मतमोजणीत गैरप्रकार होत असल्याचा आरोप डोनाल्ड ट्रम्प यांच्याकडून सातत्याने होत असून त्यांनी कोर्टात जाण्याचा निर्णय घेतला होता. मात्र, मिशिगन आणि जॉर्जिया कोर्टाने ट्रम्प यांना धक्का दिला असून त्यांच्या याचिका फेटाळल्या आहेत. ट्रम्प यांच्या प्रचार मोहीम टीमकडून जॉर्जियातील कोर्टात याचिका दाखल करण्यात आली होती. जॉर्जियामध्ये उशिराने आलेल्या ५३ मतपत्रिकांचा समावेश हा वेळेत आलेल्या मतपत्रिकांमध्ये करण्यात आल्याचा दावा करण्यात आला. त्याशिवाय मतमोजणीत गैरप्रकार होत असल्याचा दावा करण्यात आला. मात्र, कोर्टाने ही याचिका फेटाळून लावली आहे. याचिकेतील दाव्याबाबत कोणताही पुरावा नसल्याचे सांगत जॉर्जिया कोर्टाने ही याचिका फेटाळून लावली. तर, मिशिगनमध्येही ट्रम्प यांना धक्का बसला. ट्रम्प यांच्यावतीने दाखल करण्यात आलेली याचिका फेटाळण्यात आली. आरोपात कोणतेही तथ्य दिसत नसल्याचे कोर्टाने म्हटले. वाचा: नेवादामध्ये ही मतमोजणी दरम्यान गैरप्रकार झाल्याचा आरोप ट्रम्प यांच्या प्रचार मोहीम टीमकडून करण्यात आला. मात्र, मिशिगन आणि जॉर्जिया कोर्टाने फेटाळलेल्या याचिकांवर कोणतीही प्रतिक्रिया व्यक्त करण्यात आली नाही. वाचा: वाचा: मिशिगनमध्ये बायडन विजयी झाले असून नेवादामध्ये सध्या ते आघाडीवर आहेत. तर, जॉर्जियामध्ये ट्रम्प आघाडीवर आहेत. मात्र, या राज्यांमध्ये दोन्ही उमेदवारांच्या मतांमध्ये फारसे अंतर नाही. त्यामुळे इथेही चुरशीची लढत सुरू आहे. नेवादामध्ये सहा इलेक्टोरल मते असून बायडन यांनी या राज्यात विजय मिळवल्यास त्यांच्या इलेक्टोरल मतांची संख्या २७० इतकी होणार आहे. तर, ट्रम्प यांना नेवादासह मतमोजणी सुरू असलेल्या राज्यांमध्ये विजय मिळवणे आवश्यक आहे. वाचा: दरम्यान, मतमोजणी थांबवण्याची मागणी राष्ट्राध्यक्ष डोनाल्ड ट्रम्प यांनी केली आहे. उशिरा आलेल्या मतपत्रिकांची मतमोजणी न करण्याची मागणी त्यांनी केली. मतमोजणीत गैरप्रकार सुरू असल्याचा आरोप त्यांनी केला. तर, दुसरीकडे प्रत्येक मतांची मोजणी झाली पाहिजे अशी मागणी डेमोक्रॅटीक पक्षाचे उमेदवार जो बायडन यांनी केली आहे. मतमोजणीच्या आरोप-प्रत्यारोपांवरून ट्रम्प समर्थक आणि विरोधक रस्त्यावर उतरले असून काही शहरांमध्ये तणावाचे वातावरण आहे.
