वॉशिंग्टन: जागतिक महासत्ता असलेल्या अमेरिकेच्या राष्ट्राध्यक्षपदाच्या निवडणुकीची मतमोजणी सुरू होऊन जवळपास ७२ तास झाले आहेत. मात्र, अद्यापही पुढील राष्ट्राध्यक्ष कोण, याबाबतचे चित्र स्पष्ट झाले नाही. डेमोक्रॅटीक पक्षाचे जो बायडन यांना सहा इलेक्टोरल मतांची आवश्यकता आहे. तर, ट्रम्प यांना आतापर्यंत २१४ मते मिळाली आहेत. ट्रम्प यांनी पुन्हा मतमोजणी करण्याची मागणी केली आहे. अमेरिकेचा पुढील राष्ट्राध्यक्ष कोण याचा निर्णय आता चार राज्यांच्या निकालांवर अवलंबून आहे. यामध्ये जॉर्जिया, पेन्सिलवेनिया, एरिजोना आणि नेवादा या राज्यांचा समावेश आहे. नेवादामध्ये बायडन आघाडीवर असून इतर राज्यांमध्ये ट्रम्प आघाडीवर आहेत. बायडन यांना २७० हा जादूई आकडा गाठण्यासाठी सहा मतांची आवश्यकता आहे. नेवादामध्ये सहा मते असून बायडन आघाडीवर आहेत. वाचा: तर, ट्रम्प यांना चारही राज्यांमध्ये विजय मिळवावा लागणार आहे. मतमोजणी वाढल्यानंतर ट्रम्प यांची आघाडी कमी होऊ लागली आहे. जॉर्जियामध्ये १६ इलेक्टोरल मते आहेत. तर, पेन्सिलवेनियामध्ये २० मते असून ट्रम्प आघाडीवर असले तरी मतांचा फरक कमी झाला आहे. या चारही राज्यांमध्ये विजय मिळाल्यास ट्रम्प पुन्हा एकदा राष्ट्राध्यक्ष होऊ शकतात. वाचा: पुन्हा मतमोजणी झाल्यास ट्रम्प यांना फायदा? डोनाल्ड ट्रम्प यांनी पुन्हा मतमोजणी करण्यासह सध्या सुरू असलेली मतमोजणी थांबवण्याची मागणी केली आहे. पुन्हा मतमोजणी झाली तरी ट्रम्प यांच्या विजयाची शक्यता कमी असल्याचे तज्ज्ञांनी सांगितले. सध्या ज्या राज्यांमध्ये अतिशय कमी मतांच्या फरकाने बायडन ज्या राज्यांमध्ये विजयी झालेत, त्या राज्यांमध्ये पुन्हा मतमोजणी करून घेण्याचा ट्रम्प यांच्या प्रचार मोहिमेच्या टीमचा प्रयत्न आहे. यामध्ये मिशिगन आणि विस्कोन्सिन या राज्यांचा समावेश आहे. वाचा: मतमोजणीत गैरप्रकार झाला असल्याचा आरोप करून पुन्हा मतमोजणी करता येईल असा ट्रम्प यांच्या प्रचार टीमचा होरा होता. मात्र, मिशिगन आणि जॉर्जिया कोर्टाने पुरावे नसल्याचे सांगत या याचिका फेटाळल्या आहेत. तर, विस्कोन्सिनमध्येही पुन्हा मतमोजणी होऊ शकते. मात्र, त्यासाठी दोन्ही उमेदवारांना मिळालेल्या मतांचे अंतर एक टक्क्यांपेक्षा कमी हवे. पुन्हा मतमोजणी झाल्यास ट्रम्प यांना १३ दिवसांची आणखी प्रतिक्षा करावी लागू शकते. वाचा: दरम्यान, ट्रम्प यांनी आपल्या विजयाचा दावा केला आहे. अवैध मतांद्वारे या निवडणुकीवर दरोडा टाकण्याचा प्रयत्न सुरू असल्याचा आरोप ट्रम्प यांनी केला. अनेक मोठ्या राज्यांमध्ये आम्ही मोठ्या मतांच्या फरकाने विजयी होत असल्याचे ट्रम्प यांनी सांगितले.
