वॉशिंग्टन: करोना संसर्गाशी दोन हात करणारी अमेरिका आता लवकरच आणखी एका लशीला मंजुरी देण्याची दाट शक्यता आहे. सध्या आणीबाणीच्या स्थितीत फायजरची लस देण्यास सुरुवात झाली असून आता मॉडर्नाने विकसित केलेली लस वापरण्यास परवानगी मिळणार असल्याचे बोलले जात आहे. शुक्रवारी अमेरिकेच्या अन्न आणि औषध प्रशासनाच्या (FDA) बैठकीत याबाबत निर्णय घेतला जाण्याची शक्यता वर्तवण्यात येत आहे. मॉडर्ना कंपनीने करोनाला अटकाव करणारी लस विकसित केली आहे. करोनाविरोधात लढण्यास लस सुरक्षित आणि सक्षम असल्याचा दावा करण्यात आला आहे. मॉडर्नाने जवळपास ३० हजार स्वयंसेवकांवर लस चाचणी केली होती. चाचणीत ९४.१ टक्के लस प्रभावी असल्याचे दिसून आले. लस दिल्यानंतर मात्र काहीजणांना त्रास झाल्याचे दिसून आले. यामध्ये सौम्य स्वरुपाचा ताप येणे, डोकेदुखी आणि थकवा जाणवणे आदी लक्षणे आढळून आली. या साइड इफेक्टमुळे चिंता करण्याची आवश्यकता नसल्याचे शास्त्रज्ञांनी म्हटले. लशीला मंजुरी मिळाल्यानंतर अमेरिकेत लसीकरण सुरू करण्यात येईल. अमेरिका सरकारने याआधीच मॉडर्ना कंपनीला १० कोटी लशीच्या डोसची ऑर्डर दिली आहे. या लशीचे दोन डोस चार आठवड्यात घ्यावे लागणार आहे. वाचा: >> लस 'या' दिवसापासून उपलब्ध होणार? मॉडर्ना कंपनीचे सीईओ स्टीफन बॅसेंल यांनी सांगितले की, सर्व प्रक्रिया सुरळीतपणे पार पडल्यास आणि लसीला मंजुरी दिल्यास २१ डिसेंबरपासून लस बाजारात उपलब्ध होईल. लस चाचणी दरम्यान सर्व प्रकारचे शास्त्रीय निकषांचे पालन करण्यात आल्याचा दावा कंपनीने केला आहे. वाचा: >> इतकी असणार किंमत? फायजरच्या लशीप्रमाणे मॉडर्नाच्या लशींनाही अतिशय कमी तापमानात ठेवावे लागते. मॉडर्नाच्या लशीची किंमत ही ३२ ते ३७ डॉलरच्या घरात असण्याची शक्यता आहे. लशींची मागणी वाढल्यास किंमती आणखी कमी होण्याची शक्यता आहे. मात्र, तरीदेखील विकसनशील देशांना ही लस कितपत परवडेल अशीही शंका उपस्थित करण्यात आली आहे. वाचा: अमेरिकेत फायजरची लस देण्यास सुरुवात करण्यात आली आहे. करोनाने मागील आठवड्यातील बुधवारी विक्रमी ३,२६३ रुग्णांचा बळी घेतल्यानंतर अमेरिकेचे प्रशासन खडबडून जागे झाले. आणीबाणीची परिस्थिती लक्षात घेता फायझर आणि बायोएनटेकच्या कोविड-१९ लशीला आणीबाणीच्या काळातील वापरासाठी हिरवा झेंडा दाखण्यात आला. अमेरिकेच्या ‘एफडीए’च्या अंतर्गत येणाऱ्या लस व संबंधित जैविक उत्पादन सल्लागार समितीची बैठकीतील आठ तासांच्या लस आणीबाणीच्या स्थितीत वापरण्याची शिफारस ‘एफडीए’ला करण्याचा निर्णय मतदानाद्वारे घेण्यात आला. लशीच्या वापराच्या बाजूने १७ व विरोधात ४ मते पडली व एक सदस्य तटस्थ राहिला होता. ही लस १६ वर्षावरील व्यक्तींना देण्यात येणार आहे.
