वेलिंग्टन: जगभरातील अनेक देशांमध्ये करोनाची दुसरी लाट आली असताना न्यूझीलंडने आनंदाची बातमी दिली आहे. न्यूझीलंड आता पूर्णपणे करोना मुक्त झाला असून सर्व निर्बंध हटवण्यात आले आहेत. न्यूझीलंडमध्ये एकही करोनाबाधित नाही. त्यानंतर हे निर्बंध हटवण्यात आले आहेत. न्यूझीलंड आता सतर्कतेच्या लेव्हल-१ च्या पातळीवर असून हा स्तर सर्वात कमी धोकादायक असल्याचे संकेत देतो. न्यूझीलंडमध्ये आता नव्या नियमांनुसार, सोशल डिस्टेंसिंगचे सक्तीने पालन करण्याची आवश्यकता नसून लोकांना सार्वजनिक ठिकाणी एकत्र येणे शक्य आहे. मात्र, परदेशी प्रवाशांना देशात प्रवेश करण्यास मनाई करण्यात आली आहे. न्यूझीलंडमध्ये मागील दोन आठवड्यांपासून एकही करोनाबाधित आढळला नाही. पंतप्रधान जेसिंडा अर्डर्न यांनी सांगितले की, न्यूझीलंड करोनापासून पूर्णपणे मुक्त झाल्याची बातमी आनंदाची आहे. ही बातमी समजल्यानंतर माझा आनंद गगनात मावेनासा झाला. आपण सध्या सुरक्षित आणि मजबूत स्थितीत आहोत. सध्या तरी करोनापूर्व काळात पोहचणे शक्य नसल्याचे त्यांनी सांगितले. वाचा: अर्डर्न यांनी म्हटले की, न्यूझीलंड करोनामुक्त झाल्यामुळे आता पूर्ण लक्ष हे आर्थिक विकासाकडे असणार आहे. अजूनही आपले काम संपले नाही. मात्र, हे यशदेखील खूप मोठे आहे. नागरिकांचे यासाठी आभार मानत असल्याचेही पंतप्रधानांनी म्हटले. न्यूझीलंडमध्ये २५ मार्च रोजी लॉकडाउन लागू करण्यात आला होता. त्यानंतर टप्प्याटप्प्याने लॉकडाउनचे निर्बंध मागे घेण्यात आले होते. वाचा: वाचा: जगभरात ७.२२ कोटीहून अधिक बाधित जगभरात करोना संसर्गाचे थैमान सुरू आहे. करोनाबाधितांची संख्या सात कोटी २२ लाखांहून अधिक झाली आहे. तर, १६ लाखांहून अधिकजणांचा मृत्यू झाला असल्याची माहिती जॉन्स हॉपकिन्स विद्यापीठाने दिली. अमेरिकेत करोनाचा सर्वाधिक संसर्ग फैलावला आहे. अमेरिकेत एक कोटी २४ लाखांहून अधिकजणांना करोनाची बाधा झाली आहे. त्यापैकी दोन लाख ९९ हजारजणांचा मृत्यू झाला आहे. करोनाबाधितांच्या संख्येनुसार भारतात ९८ लाख नागरिकांना करोनाची बाधा झाली असून एक लाख ४३ हजारजणांना प्राण गमवावे लागले आहे. करोनाच्या संसर्गाला अटकाव करण्यासाठी लस विकसित करण्याचे प्रयत्न सुरू आहेत. ब्रिटनमध्ये फायजरच्या लसीला मंजुरी दिली असून मागील आठवड्यांपासून लसीकरण सुरू झाले आहे. तर, अमेरिकेतही फायजरच्या लस वापरास आणीबाणीच्या स्थितीत मंजुरी देण्यात आली आहे.
