वॉशिग्टन: जगभरात करोनाच्या संसर्गाने थैमान घातले आहे. करोनाला अटकाव करण्यासाठी विविध पातळीवर प्रयत्न सुरू आहेत. ब्रिटन आणि अमेरिकेमध्ये करोना प्रतिबंधक लसीकरण सुरू झाले आहे. तर, भारतासह अन्य देशांमध्ये लसीकरणाचे नियोजन वेगाने सुरू आहे. मात्र, या लसीकरणात लहान मुलांना लस दिली जाणार नसल्याची दाट शक्यता आहे. अमेरिकेमध्ये १६ वर्षांवरील व्यक्तींनाच फायझरची लस देण्यास मान्यता देण्यात आली आहे. १२ वर्षांच्या मुलांवर लसचाचणी ऑक्टोबरमध्ये सुरू करण्यात आली असून, ती पुढील काही महिने सुरू राहण्याची शक्यता आहे. या लसचाचणीचे समाधानकारक निष्कर्ष मिळाल्याशिवाय या वयोगटातील मुलांसाठी करोना लशीचा आपत्कालीन वापर करण्यास अमेरिकेचे अन्न आणि औषध प्रशासन परवानगी देणार नाही. फायझरपाठोपाठ मॉडर्ना कंपनीच्या लशीला अमेरिकेमध्ये हिरवा कंदिल मिळण्याची शक्यता आहे. या कंपनीने १२ ते १७ वयोगटातील मुलांवर याच महिन्यात लसचाचणी सुरू केली आहे. ही चाचणी वर्षभर सुरू राहणार आहे. तर, १२ वर्षांखालील मुलांवर सन २०२१च्या प्रारंभी चाचणी सुरू होणे अपेक्षित आहे. त्यामुळे एकंदरच पुढील शैक्षणिक वर्ष सुरू होण्यापूर्वी लहान मुलांवरील चाचणीचे निष्कर्ष मिळणे कठीण आहे. वाचा: प्रौढांवरील करोना लसचाचणीचे सकारात्मक निष्कर्ष आश्वासक असून, मुलांवर चाचणी करणे सुरक्षित असल्याचे संकेत त्यातून मिळाले आहेत, असे वँडरबिल्ट युनिव्हर्सिटीमधील संसर्गजन्य बालरोग विशेषज्ञ आणि या युनिव्हर्सिटीच्या लस संशोधन प्रकल्पाचे संचालक डॉ. बड्डी क्रीच यांनी सांगितले. तर करोनामुळे मुले सहसा जास्त आजारी पडलेली नाहीत. मात्र, ती इतरांमध्ये करोना विषाणू पसरवू शकतात. हे केवळ त्यांच्यासाठीच नव्हे, तर समाजासाठीही फारच महत्त्वाचे आहे, असे सिनसिनाटी बालरुग्णालयातील फायझर कंपनीचे मुख्य संशोधक डॉ. रॉबर्ट फ्रेन्क यांनी सांगितले. वाचा: अमेरिकेत दोघांवर लशीचे दुष्परिणाम अमेरिकेतील अलास्का शहरात दोन आरोग्य कर्मचाऱ्यांना लस दिल्यानंतर त्यांची तब्येत बिघडल्याचे दिसून आले. लस दिल्यावर काही मीनिटातच आरोग्य कर्मचाऱ्यांना त्रास होऊन तब्येत खालावली होती. हे दोघेही आरोग्य कर्मचारी एकाच रुग्णालयात कार्यरत होते. लस देण्यात आलेल्या एका महिला आरोग्य कर्मचाऱ्याला आधीपासून अॅलर्जीचा कोणताही त्रास नव्हता. लस दिल्यानंतर पहिल्या दहा मीनिटातच तिची तब्येत खालावू लागली, अशी माहिती बार्टलेट रिजनल हॉस्पिटलच्या अधिकाऱ्याने दिली. सध्या या दोघाची प्रकृती स्थिर असल्याची माहिती देण्यात आली आहे.
