लखनऊ: उत्तर प्रदेशात ५० मुलांच्या लैंगिक शोषणाच्या आरोपाखाली अटकेत असलेल्या कनिष्ठ अभियंत्याची पत्नी दुर्गावतीला सीबीआयने सोमवारी अटक केली. पतीला या गुन्ह्यात साथ दिल्याचा आणि साक्षीदारांवर दबाव आणल्याचा तिच्यावर आरोप आहे. या घटनेचा सीबीआयकडून तपास सुरू आहे. सीबीआयने सोमवारी इंजिनीअरच्या पत्नीला अटक करून कोर्टात हजर केले. सीबीआयने तिच्या कोठडीची मागणी केली आहे. या प्रकरणात कोर्टात पुढील सुनावणी ४ जानेवारी २०२१ रोजी होणार आहे. सुनावणीपर्यंत आरोपी महिलेची रवानगी तुरुंगात करण्यात आली आहे. साक्षीदारांना धमकी मुलांचे केल्याप्रकरणी अटकेत असलेल्या इंजिनीअरची पत्नी दुर्गावती ही साक्षीदारांना धमकावून त्यांच्यावर दबाव टाकत असल्याचे तपासात स्पष्ट झाले. इंजिनीअरची पत्नी दुर्गावती ही देखील या गुन्ह्यात त्याला साथ देत होती आणि आता साक्षीदारांना धमकावत असल्याचे पीडित मुलांनी सीबीआयच्या अधिकाऱ्यांना सांगितले. त्यानंतर सीबीआयने दुर्गावतीविरोधात पॉक्सोंतर्गत कलम १७ आणि १२० अन्वये गुन्हा दाखल केला आहे. सोमवारी बांदा येथील कोर्टात दुर्गावतीला हजर करण्यात आले. मुलांना गॅझेट्सचं प्रलोभन दाखवायचा! आरोपी इंजिनीअर राम भवन याला सीबीआयने १६ नोव्हेंबर रोजी चित्रकूट स्थित त्याच्या घरातून अटक केली होती. राम भवन याने ५० हून अधिक मुलांचे लैंगिक शोषण केल्याचा आरोप आहे. त्यातील ३० मुलं ही चित्रकूट जिल्ह्यातील, तर २५ मुले ही बांदा जिल्ह्यातील आहेत. या मुलांचे वय ५ ते १६ वर्षांपर्यंत आहे. मुलांना तो गॅझेट्स देण्याचे प्रलोभन देत असे. आरोपीचे ई-मेल तपासले असता, तो अश्लील फोटो आणि व्हिडिओ शेअर करण्यासाठी देश-विदेशातील अनेक टोळ्यांच्या संपर्कात होता. तसेच पीडित मुलांच्या कुटुंबीयांना ब्लॅकमेल करून त्यांच्याकडे पैशांची मागणी करत असल्याचे तपासातून स्पष्ट झाले आहे.
