वॉशिंग्टन: अध्यक्षपदाची सूत्रे स्वीकारल्यानंतर पहिल्या १०० दिवसांत १० कोटी अमेरिकींना करोनाची लस देण्यात येईल, अशी महत्त्वाकांक्षी घोषणा अमेरिकेचे नवनिर्वाचित अध्यक्ष जो बायडन यांनी मंगळवारी केली. याशिवाय मास्क वापरणे सर्वांसाठी अनिवार्य करण्यात येईल व बहुतांश शाळा पुन्हा सुरू करण्याचा प्रयत्न केला जाईल, असेही ते म्हणाले. अमेरिका राष्ट्राध्यक्षपदाच्या निवडणुकीत करोना संसर्गाच्या मुद्यावर मोठी चर्चा झाली होती. अमेरिकेच्या अर्थकारणालाही करोनामुळे मोठा फटका बसला आहे. एक कोटीहून अधिकजणांना करोनाची लागण झाली असून अडीच लाख नागरिकांना प्राण गमवावे लागले आहे. बायडन यांनी राष्ट्रीय आरोग्य पथकाची घोषणा केली, त्यावेळी ते बोलत होते. आपण एक आपत्ती निवारण तज्ज्ञांचे पथक नियुक्त केले असून यातील तज्ज्ञ अमेरिकेला आर्थिक संकटातून बाहेर काढतील तसेच, आरोग्यसेवा उंचावण्याचा प्रयत्न करतील, असा विश्वास त्यांनी व्यक्त केला. फायझर व मॉडर्ना यांच्याशी यापूर्वी झालेल्या चर्चेनुसार ट्रम्प प्रशासनाने लशींची खरेदी करण्यास सुरुवात करावी. तसेच, अमेरिकी नागरिक व जगभरातील देशांना या लशी पुरवण्यासाठी आवश्यक उत्पादन करण्याचेही या कंपन्यांना सूचित करावे. या प्रकारे कार्यवाही झाल्यास माझ्या कार्यकाळाच्या पहिल्या १०० दिवसांत १० कोटी अमेरिकी नागरिकांना करोनाची लस देणे शक्य होईल, असे ते म्हणाले. भारतीय डॉक्टरवर विश्वास बायडन यांनी घोषित केलेल्या राष्ट्रीय आरोग्य पथकामध्ये डॉ. विवेक मूर्ती या भारतीय डॉक्टरचा समावेश आहे. वाचा: वाचा: बायडन यांनी डॉ. मूर्ती यांची सर्जन जनरल या पदी नियुक्ती केली आहे. ४३ वर्षीय डॉ. मूर्ती हे बराक ओबामा यांच्या कार्यकाळातही याच पदावर कार्यरत होते. सार्वजनिक आरोग्यसेवा आणि वैद्यकीय सल्ल्याच्या बाबतीत डॉ. मूर्ती हे माझे सर्वात विश्वासू सहकारी आहेत व त्यांच्या निरंतर जनसेवेप्रति आम्ही कृतज्ञ आहोत, अशा शब्दांत बायडन यांनी मूर्तींचा गौरव केला. मी यापुढेही समर्पित वृत्तीने अमेरिकी नागरिकांची सेवा करेन. एका गरीब भारतीय शेतकऱ्याचा नातू अमेरिकेसारख्या बलाढ्य देशाचा वैद्यकीय सल्लागार होतो ही माझ्यासाठी अभिमानाची व सन्मानाची बाब आहे, अशी प्रतिक्रिया डॉ. मूर्ती यांनी दिली. वाचा: वाचा: लसीबाबतच्या अध्यादेशावर ट्रम्प यांची स्वाक्षरी अमेरिकींना प्राधान्य लसीकरणाची मोहीम सुरू झाल्यानंतर जगभरातील अन्य देशांना मदत करण्यापूर्वी या लशीचा लाभ सर्वप्रथम अमेरिकी नागरिकांना व्हावा यासाठी आवश्यक असणाऱ्या एका सरकारी अध्यादेशावर अध्यक्ष डोनाल्ड ट्रम्प यांनी मंगळवारी स्वाक्षरी केली. यामुळे या लसीकरणात अमेरिकींना प्राधान्य मिळेल. लसीकरणामुळे आपण लाखो अमेरिकी व अन्य देशांतील लाखो नागरिकांचे प्राण वाचवू शकू, असा विश्वास ट्रम्प यांनी व्यक्त केला.
