पेशावर: पाकिस्तानमधील फरार कुख्यात दहशतवादी मंगल बाग अफगाणिस्तानमध्ये ठार झाला असल्याचे वृत्त समोर आले आहे. अफगाणिस्तानमधील अधिकाऱ्यांनी ही माहिती दिली असून रस्त्यावर झालेल्या बॉम्बस्फोटात मंगल ठार झाला. त्याच्यावर ३० लाख अमेरिकन डॉलरचे बक्षीस जाहीर करण्यात आले होते. बंदी घातलेल्या लष्कर-ए-इस्लाम या दहशतवादी समूहाचा नेता मंगल बागचा अनेक दहशतवादी कृत्यात सहभाग होता. एक्स्प्रेस ट्रिब्युनने दिलेल्या वृत्तानुसार, अफगाणिस्तानमधील नागरहार प्रांताचे राज्यपाल अमरखिल यांनी सांगितले की, नांगरहारच्या आकिन जिल्ह्यातील बंदर दारा भागात रस्त्यावर झालेल्या बॉम्बस्फोट मंगल आणि त्याचे दोन साथीदार ठार झाले. वाचा: वाचा: ट्रक क्लिनरपासून दहशतवादी झालेला बाग हा बंदी घातलेल्या तहरीक-ए-तालिबान पाकिस्तानशी संबंधित होता. बाग हा पाकिस्तानच्या खैबर जिल्ह्यात राहणारा होता. पाकिस्तानी सैन्या या भागात ऑपरेशन जर्ब-ए-अज्ब सुरू केल्यानंतर मागील काही वर्षांपासून तो अफगाणिस्तानमध्ये वास्तव्य करत होता. दहशतवादी कृत्यासह अंमली पदार्थांची तस्करी करणे, तस्करी, अपहरण, नाटोच्या ताफ्यावर हल्ला करणे, छापा मारून लूट करणे, पाकिस्तान आणि अफगाणिस्तामध्ये होणाऱ्या बेकायदेशीर व्यापारात या दहशतवादी गटाचा सहभाग होता.
