मुंबई : परदेशी गुंतवणुकीच्या तुफानी ओघाने सेन्सेक्स आणि निफ्टीने सार्वकालीन उच्चांकी स्तर गाठला आहे. डिसेंबर महिना दोन्ही शेअर निर्देशांकांसाठी सर्वात यशस्वी ठरला. याच महिन्यात परदेशी गुंतवणूकदारांनी भांडवली बाजारात तब्बल ६८ हजार ५५८ कोटींची गुंतवणूक केली आहे. करोना संकटात उदयोन्मुख बाजारपेठांमध्ये परदेशी संस्थात्मक गुंतवणूकदारांची मोठी गुंतवणूक आहे. मागील काही वर्षांपासून भारतीय भांडवली बाजारात परदेशी गुंतवणुकीचा ओघ वाढत आहे. एकीकडे जगभरात करोनाने थैमान घातलेले असताना भारतीय अर्थव्यवस्थेचे तुलनेने कमी नुकसान झाले. मार्चच्या शेवटच्या आठवड्यात केंद्र सरकारने लॉकडाउन जाहीर केला होता. त्यानंतर परदेशी गुंतवणूकदारांनी मोठ्या प्रमाणात बाजारातून पैसे काढून घेतली. केंद्र सरकारने अर्थव्यवस्थेला सावरण्यासाठी दुसया तिमाहीत आत्मनिर्भर भारत या महत्वकांक्षी योजनेत २० लाख कोटींची घोषणा केली. त्यानंतर परदेशी गुंतवणूकदार पुन्हा भारतीय बाजारांकडे आकर्षित झाले. त्यांनी गुंतवणुकीचा धडाका लावला. नॅशनल सिक्युरिटीज डिपॉझिटरी लिमिटेडच्या माहितीनुसार परदेशी संस्थात्मक गुंतवणूकदारांची आतापर्यंतची इक्विटीमधील सर्वाधिक गुंतवणूक आहे. डिसेंबरमध्ये झालेल्या ६८५५८ कोटींमधील ६२०१६ कोटी शेअरमध्ये गुंतवण्यात आले आहेत. तर ६५४२ कोटी डेट श्रेणीत गुंतवण्यात आले आहेत. सलग तिसऱ्या महिन्यात परदेशी गुंतवणूकदारांनी भांडवली बाजारात मोठी गुंतवणूक केली आहे. याआधी ऑक्टोबर महिन्यात २२०३३ कोटी आणि नोव्हेंबर महिन्यात ६२९५१ कोटींची गुंतवणूक त्यांच्याकडून करण्यात आली. सेन्सेक्स उच्चांकावर आहे. परदेशी गुंतवणूकदार स्मॉल आणि मिडकॅप शेअरलादेखील पसंती देत आहेत. या शेअरमध्ये मोठ्या संख्येने गुंतवणूक होताना दिसत आहे. यापूर्वी ब्लूचिप शेअरची निवड परदेशी गुंतवणूकदारांकडून केली जात होती, मात्र आता स्मॉल आणि मिडकॅप शेअरमध्ये त्यांना संधी दिसत असल्याचे शेअर बाजार विश्लेषक हर्ष जैन यांनी सांगितले. करोना प्रतिबंधात्मक लसीला मिळालेला प्रतिसाद आणि व्यापक प्रमाणात सुरु झालेली लसीकरण मोहीम यामुळे अर्थव्यवस्थेमध्ये पुन्हा आश्वासक वातावरण तयार होईल, असं गुंतवणूकदारांना वाटत आहे. त्यामुळे भांडवली बाजारातील तेजी यापुढे सुरूच राहील, या आशेने गुंतवणूक ओघ वाढत आहे.
