नवी दिल्ली : प्रजासत्ताक दिनाला राजधानीत उसळलेल्या हिंसाचारानंतर भाजप नेते आणि राज्यसभा खासदार यांनी आपल्याच पक्षाला घरचा अहेर दिलाय. तसंच स्वामी यांनी थेट मोदी-शहा जोडीवर निशाणा साधलाय. 'एक चर्चा सुरु आहे. कदाचित ती खोटीही असू शकते किंवा शत्रुच्या खोट्या ओळखीवरून (सोशल मीडिया अकाऊंट) पसरवण्यात आली असेल. पंतप्रधान कार्यालयाच्या जवळ असलेल्या भाजपच्या एका सदस्यानं लाल किल्ल्यावर सुरू असलेल्या गोंधळात लोकांना भडकावण्याचं काम केलं. तपासणी करून माहिती द्यावी' असं ट्विट करत सुब्रमण्यम स्वामी यांनी आपल्याच पक्षावर निशाणा साधलाय. या घटनेमुळे पंतप्रधान आणि गृहमंत्री यांच्या छबीला मोठं नुकसान झालंय. इतकंच नाही तर देशाच्या प्रतिमेलाही यामुळे नुकसान झाल्याचं सुब्रमण्यम स्वामी यांनी म्हटलंय. 'या घटनेमुळे पंतप्रधान नरेंद्र मोदी आणि अमित शहा यांच्या छबीला मोठं नुकसान पोहचलं आहे. सोबतच आंदोलन करणाऱ्या शेतकरी नेत्यांनीही आपला विश्वास गमावला आहे' असं सुब्रमण्यम स्वामी यांनी ट्विट केलंय. यासोबतच त्यांनी पंजाबच्या काँग्रेस सरकारवरही निशाणा साधलाय. या घटनेसंबंधात स्वामी यांनी पंतप्रधान मोदींनाही एक पत्र लिहिलंय. यापूर्वी, पंजाबी गायक आणि अभिनेता दीप सिद्धू याच्यावर शेतकरी आंदोलकांना भडकावण्याचा आरोप करण्यात आलाय. सिद्धू हा भाजपशी संबंधित असल्याचंही समोर आलंय. 'दीप सिद्धू हा भाजपचा कार्यकर्ता आहे', असा आरोप भारतीय किसान युनियनचे नेते राकेश टिकैत यांनी केला होता. २६ जानेवारीनंतर दिल्लीच्या लाल किल्ल्याला मात्र छावनीचं स्वरुप प्राप्त झालंय. पोलिसांसोबत सीआरपीएफच्या १५ कंपन्या तैनात करण्यात आल्या आहेत. दिल्लीतील हिंसाचारात जवळपास ३०० पोलीस जखमी झाल्याची माहिती बुधवारी पोलिसांकडून देण्यात आली होती.
