: करोनाला प्रतिबंध करणारी लस घेतली म्हणजे तुम्हाला करोनाचा संसर्ग होणारच नाही, अशा भ्रमात राहणे चुकीचे ठरू शकते. सिव्हिल हॉस्पिटलमधील एका आरोग्य कर्मचाऱ्याने लस घेऊनही आठ दहा दिवसांतच त्याचा करोना निदान चाचणीचा अहवाल पॉझिटिव्ह आल्याची माहिती विश्वसनीय सूत्रांनी दिली. लसीचा दुसरा डोस घेतल्याशिवाय कोविड विरोधातील प्रतिकारशक्ती वाढत नाही हे खरे असले तरी लसीकरणानंतरही सुरक्षाविषयक नियमांचे पालन करणे तेवढेच आवश्यक असल्याचे या प्रकारामुळे अधोरेखित झाले आहे. जिल्ह्यात करोनामुक्तीचा दर ९८ टक्क्यांच्या जवळ पोहोचला आहे. करोनाबाधितांच्या मृत्यूचा दर नियंत्रणात ठेवण्यात आरोग्य यंत्रणा यशस्वी झाल्या आहेत. जिल्ह्यात सहा महिन्यांपूर्वी शंभरात ३२ जण पॉझिटिव्ह आढळत होते. आता ही संख्या आठवर आली आहे. म्हणजेच पॉझिटिव्हीटीचा दरही चार पटींनी कमी झाला आहे. सर्वात महत्त्वाचे म्हणजे करोना विषाणूला प्रतिबंध करणाऱ्या लसीकरणाला जिल्ह्यात सुरुवात झाली असून, आरोग्य कर्मचाऱ्यांचा त्यास प्रतिसाद वाढतो आहे. सिव्हिल हॉस्पिटलमधील केंद्रावरही लसीकरणाला १०० टक्के प्रतिसाद मिळतो आहे. लसीचा पहिला डोस घेतल्यानंतर २८ दिवसांनी दुसरा डोस घेणे अनिवार्य आहे. त्याशिवाय कोविडला प्रतिबंध करणारी रोग प्रतिकारशक्ती शरीरात तेवढ्या प्रमाणात तयार होत नाही. त्यामुळे खबरदारी व सुरक्षेच्या नियमांचे पालन हाच त्यावर प्रभावी उपाय आहे. सुरक्षाविषयक त्रिसूत्रीचा अवलंब गरजेचाच लस घेतल्यानंतरही मास्कचा वापर, सुरक्षित अंतर राखणे आणि सॅनिटायझरचा वापर या सुरक्षा विषयक त्रिसूत्रीचा अवलंब बंधनकारक आहे. त्याकडे दुर्लक्ष करणे करोना संसर्गाला निमंत्रण देणारे ठरू शकते. याचाच प्रत्यय सिव्हिल हॉस्पिटलमधील एका फार्मासिस्टला आला आहे. २० जानेवारी रोजी त्यांनी कोविड प्रतिबंधक लस घेतली होती. दुसरी लस घेण्यास काही दिवसांचा अवकाश असताना हा कर्मचारी निकटवर्तीय कोविड बाधितांच्या संपर्कात आला. त्यामुळे त्यांनीदेखील करोना निदान तपासणी करवून घेतली. त्यांचा अहवाल पॉझिटिव्ह आला. फारशी लक्षणे व त्रास नसल्याने ते घरीच उपचार घेत असल्याची माहिती विश्वसनीय सूत्रांनी दिली.
