वॉशिंग्टन : ई-कॉमर्समधील दिग्गज कंपनी असलेल्या अॅमेझॉनचे संस्थापक आणि सर्वेसर्वा असलेल्या जेफ बेझॉस यांनी मोठी घोषणा केली आहे. जगातील सर्वाधिक श्रीमंतांपैकी एक असलेल्या बेझॉस यांनी अॅमेझॉनच्या सीईओ पदावरून पाय उतार होण्याचा निर्णय घेतला आहे. यामुळे कॉर्पोरेट जगतात खळबळ उडाली आहे. (Jeff Bezos to step down from CEO of Amazon) चालू वर्षाच्या तिसऱ्या तिमाहीत बेझॉस अॅमेझॉनच्या सीईओ पदावरून पाउतार होतील आणि त्याऐवजी कार्यकारी अध्यक्षपदाची जबाबदारी स्वीकारतील, असे कंपनीने म्हटलं आहे. अॅमेझॉनच्या वेब सर्व्हिसचे प्रमुख अॅंडी जेसी (Andy Jassy will be new CEO of Amazon) यांच्याकडे अॅमेझॉनच्या प्रमुख पदाची सूत्रे सोपवली जाणार आहेत. करोना आणि टाळेबंदीमध्ये अॅमेझॉनच्या विक्रीत मोठी वाढ झाली आहे. अॅमेझॉनने सलग तिसऱ्या तिमाहीत विक्रमी नफा कमावला आहे. तर तिमाहीत विक्री पहिल्यांदाच १०० अब्ज डॉलरच्या पुढे गेली आहे. अॅमेझॉनने १२५.५६ अब्ज डॉलरची विक्री केली आहे. या विक्रीने आतापर्यंतचे सर्व रेकॉर्ड तोडले तसेच विश्लेषकांचे अंदाज चुकवले. कंपनीतील खांदेपालट तिसऱ्या तिमाहीत केला जाईल, असं अॅमेझॉनने म्हटलं आहे. सध्या कंपनीच्या वेब सर्व्हिस आणि क्लाउड कम्प्युटिंग विभागाचे प्रमुख अॅंडी जेसी हे पुढचे अॅमेझॉनचे मुख्य कार्यकारी अधिकारी असतील, असे कंपनीनं म्हटलं आहे. अॅमेझॉनच्या वेबसाईटवर कर्मचाऱ्यांना उद्देशून लिहिलेल्या संदेशात जेफ बेझॉस यांनी सीईओ पदावरून पाय उतार होत असलो तरी कार्यकारी अध्यक्ष म्हणून अॅमेझॉनच्या महत्वाच्या उपक्रमांमध्ये माझा सहभाग राहील. मात्र डे १ फंड , दि बेझॉस अर्थ फंड, ब्लु ओरिजिन, दि वॉशिंग्टन पोस्ट आणि इतर उपक्रमांसाठी आता थोडी मोकळीक हवी आहे, असे बेझॉस यांनी म्हटलं आहे.
