मुंबई : तिसऱ्या तिमाहीत विकासदर वाढल्याने नकारात्मकतेची मरगळ झटकत आज सेन्सेक्स आणि निफ्टीने तेजीची वाट धरली आहे. गुंतवणूकदारांनी केलेल्या चौफेर खरेदीने सेन्सेक्स ८०० अंकांनी वधारला आहे. तर राष्ट्रीय शेअर बाजाराचा निफ्टी २५० अंकांनी वाढला आहे. या तेजीच्या लाटेने गुंतवणूकदारांची किमान दोन लाख कोटींची भरपाई झाली आहे. आज नवीन महिना सुरु झाला असून पहिल्याच सत्रात सेन्सेक्स आणि निफ्टीने जबरदस्त सुरुवात केली आहे. आशियातील सकारात्मक संकेतांनी बाजारात तेजीचा माहौल आहे. बँका, वित्त संस्था, ऑटो, मेटल, रियल्टी या क्षेत्रात खरेदीचा ओघ आहे. अमेरिकेने १.९ लाख कोटी डॉलर्सच्या आर्थिक पॅकेजला मंजुरी दिली आहे. त्या पार्श्वभूमीवर आज आशियातील भांडवली बाजारात तेजी असल्याचे शेअर दलालांनी सांगितले. त्याशिवाय जागतिक कमॉडिटी बाजारात कच्च्या तेलाचा भाव वधारला आहे. तेलाची किंमत ६५ डॉलरवर गेली आहे. इंधन मागणीत होणारी वाढ अर्थव्यवस्था सावरत असल्याची लक्षणे आहेत. भारतीय अर्थव्यवस्थेने चालू वर्षाच्या तिसऱ्या तिमाहीत वृद्धी नोंदवली आहे. त्यामुळे बाजारातील वातावरण बदलले आहे. शुक्रवारी संध्याकाळी केंद्र सरकारने विकासदराची आकडेवारी जाहीर केली. करोना संकटाशी दोन हात करताना झालेल्या प्रचंड हानीमधून भारतीय अर्थव्यवस्था सावरली आहे. ऑक्टोबर ते डिसेंबर या तिमाहीत आर्थिक आहे. सलग दोन तिमाहीतील उणे विकासाची मरगळ झटकत अर्थव्यवस्थेने ०.४ टक्के विकासदर नोंदवला. (GDP 0.4 percent in third quarter) त्यामुळे तंत्रिकदृष्ट्या मंदीच्या फेऱ्यात अडकलेल्या भारतीय अर्थव्यवस्थेची सुटका झाल्याचे बोलले जात आहे. सध्या सेन्सेक्स ८८५ अंकांनी वधारला असून तो ४९९८५ अंकावर आहे. तर राष्ट्रीय शेअर बाजाराचा निफ्टी २६७ अंकांनी वधारून १४७९५ अंकावर आहे. आजच्या तेजीच्या लाटेत गुंतवणूकदारांची मालमत्ता किमान दोन लाख कोटींनी वाढली आहे. आज बाजारात सेन्सेक्स मंचावर ३० पैकी २७ शेअर तेजीत आहेत.एचडीएफसी, आयसीआयसीआय बँक, एचडीएफसी बँक, रिलायन्स इंडस्ट्रीज, इन्फोसिस, टीसीएस या सारख्या ब्लूचिप शेअरमध्ये मोठी वाढ झाली आहे. टेलिकॉम शेअरमध्ये भारती एअरटेलचा शेअर ५ टक्क्यांची घसरण झाली आहे. एचयूएल, डॉ. रेड्डीज लॅब या शेअरमध्ये घसरण झाली आहे. वाहन उद्योगात देखील आज गुंतवणूकदारांनी चांगली खरेदी केली आहे. महिंद्रा अँड महिंद्रा, मारुती सुझुकी, टाटा मोटर्स, टीव्हीएस , बजाज ऑटो, अशोक लेलँड, एमआरएफ या शेअरमध्ये वाढ झाली आहे. निफ्टीवरील सर्वच क्षेत्रीय निर्देशांकात वाढ झाली आहे. ज्यात निफ्टी आयटी, निफ्टी ऑटो आदी निर्देशांक २ टक्क्यांनी वाढले आहेत. शुक्रवारी गुंतवणूकदारांचे ५.४३ लाख कोटींचे नुकसान झाले होते करोना रुग्णसंख्येत होत असलेली वाढ, महागाईचा आगडोंब आणि अमेरिकेतील नकारात्मक संकेतांनी आज भांडवली बाजारात गुंतवणूकदारांना कापरे भरले. आज मुंबई शेअर बाजाराच्या सेन्सेक्समध्ये तब्बल १९३९ अंकांची घसरण झाली. तर राष्ट्रीय शेअर बाजाराचा निफ्टी ५६८ अंकांनी कोसळला. आजच्या पडझडीत गुंतवणूकदारांचे ५.४३ लाख कोटींचे नुकसान झाले. घसरण इतकी भीषण होती कि प्रत्येक मिनिटाला गुंतवणूकदारांना १४५० कोटींचा फटका बसला. निफ्टी मंचावरील सर्वच्या सर्व शेअरमध्ये घसरण झाली. याआधी ४ मे २०२० नंतर आज पुन्हा एकदा शेअर बाजारात मोठी पडझड दिसून आली.
