मेलबर्न: ऑस्ट्रेलियातील सर्वाधिक लोकसंख्या असलेले दुसरे राज्य व्हिक्टोरियाची राजधानी मेलबर्नमध्ये करोनाबाधितांची संख्या वाढल्यानंतर कडक लॉकडाउनची घोषणा करण्यात आली आहे. मेलबर्न शहरात फक्त २६ करोनाबाधित आढळले आहेत. शहराची लोकसंख्या ५० लाखाच्या आसपास आहे. इतक्या कमी प्रमाणात बाधित असतानाही लॉकडाउन लागू करण्यात आला आहे. या कारणांसाठी लॉकडाउन? लॉकडाउन काळात लोकांना घराबाहेर पडण्यास आणि इतरांना भेटण्यास बंदी आहे. मेलबर्नच्या प्रशासनाने सांगितले की, हॉटेल क्वारंटाईन दरम्यान नियमांचे उल्लंघन करण्यात येत आहे. त्यामुळे करोनाबाधितांची संख्या वाढत आहे. इतकंच नव्हे तर करोनाबाधितांमध्ये अधिक संसर्गजन्य असणाऱ्या बी.१.६१७ हा वेरिएंट आढळला आहे. त्याशिवाय व्हिक्टोरिया राज्यात लसीकरणाचा वेगही कमी आहे. वाचा: बी.१.६१७ वेरिएंटमुळे भीतीचे वातावरण व्हिक्टोरिया राज्याचे कार्यवाहक स्टेट प्रीमियर जेम्स मर्लिनो यांनी सांगितले की, आम्हाला विषाणूचा अधिक वेगाने संसर्ग करणाऱ्या बी.१.६१७ या वेरिएंटचे आव्हान आहे. आमची चिंता या वेरिएंटने वाढवली आहे. बी.१.६१७ मुळे मेलबर्नमध्ये करोनाबाधितांची संख्या वाढली आहे. परदेशातून ऑस्ट्रेलियात परतलेल्या प्रवाशामुळे हा वेरिएंट फैलावला असल्याचे म्हटले जाते. वाचा: लॉकडाउनचे आदेश लॉकडाउनच्या आदेशानंतर गुरुवार रात्रीपासून मेलबर्नमधील शाळा, पब आणि रेस्टोरंट्स बंद करण्यात आले. लोकांना एकत्र जमण्यासही मनाई करण्यात आली आहे. त्याशिवाय सार्वजनिक ठिकाणी मास्कचा वापर अनिवार्य करण्यात आला आहे. नवीन स्ट्रेन आढळल्यानंतर न्यूझीलंडने व्हिक्टोरियाहून येणाऱ्या विमानावर बंदी घातली आहे. वाचा: लसीकरणावरून आरोप-प्रत्यारोप व्हिक्टोरियाच्या प्रीमियरने राज्यात धीम्या गतीने होत असलेल्या लसीकरणासाठी पंतप्रधान स्कॉट मॉरिसन यांच्या सरकारला जबाबदार ठरवले आहे. त्यांनी सांगितले की, अधिक संख्येने लोकांना करोनाची लस दिली असती तर आज वेगळी परिस्थिती असती. मेलबर्नमध्ये चौथ्यांदा लॉकडाउन लागू करण्यात आला आहे. मागील वर्षीदेखील मेलबर्नमध्ये चार महिन्यांपर्यंत कठोर लॉकडाउन लावण्यात आला होता.
