पुणे : उपमुख्यमंत्री आणि पुण्याचे पालकमंत्री अजित पवार () यांच्या उपस्थितीत पुण्यात आज एक महत्त्वपूर्ण बैठक होत आहे. शहरात करोनाचा प्रादुर्भाव वाढल्यानंतर पुण्यात कडक लॉकडाऊनचा विचार करावा, अशा सूचना मुंबई हायकोर्टाने राज्य सरकारला दिल्या होत्या. या पार्श्वभूमीवर अजित पवार यांच्या नेतृत्वात होत असलेल्या बैठकीत शहरात पूर्णपणे लॉकडाऊन (Lockdown in Pune) करण्याचा निर्णय घेतला जाण्याची शक्यता व्यक्त केली जात आहे. पण या सगळ्यावर पुण्याचे महापौर महापौर मुरळीधर मोहोश यांनी नाराजी व्यक्त केली आहे. हायकोर्टाने सादर केलेली आकडेवारी आणि राज्य सरकार सांगत असलेली आकडेवारी यामध्ये तफावत असून याविरोधात आम्ही कोर्टामध्ये प्रतिज्ञापत्र सादर करणार असल्याचं मोहोळ यांनी म्हटलं आहे. हायकोर्टाने दिलेल्या सूचनेवर पुण्यात लॉकडाऊनचा पुढील निर्णय घेण्यात येणार आहे. पण कोर्टात सादर झालेली आकडेवारी कधीची आहे याबद्दल शंका असल्याचं मोहोळ म्हणाले. मुरळीधर मोहोळ यांनी दिलेल्या माहितीनुसार, पुण्यात कोरोनाचा संसर्ग कमी होताना दिसत आहे. गेल्या आठवड्याभरात १६ हजाराच्या संख्येने अॅक्टिव्ह रुग्ण कमी झाले. पुणे शहरात सध्या 39 हजार कोरोना रुग्ण असल्याची माहिती आहे. पण कोर्टात ती १ लाख दाखवली जात आहे. त्यामुळे यात नेमकी तफावत कशी याबद्दल माहिती मिळणं आवश्यक असल्याचं मोहोळ यांनी सांगितलं. 'पुण्यात कडक लॉकडाऊनची गरज नाही...' दरम्यान, पुण्यात आधीच लॉकडाऊन करण्यात आला आहे. यामध्ये फक्त ७ ते ११ यावेळेत दुकानं फक्त उघडतात त्यामुळे आणखी वेगळ्या कडक लॉकडाऊनची गरज नाही असंही यावेळी महापौर म्हणाले. त्यामुळे अजित पवार बैठकीत काय निर्णय घेणार आणि त्यावर पुण्याच्या महापौरांची काय प्रतिक्रिया असणार हे पाहणं आता महत्त्वाचं आहे. शहरात खरंच पूर्णपणे लॉकडाऊन होणार? मुख्यमंत्री उद्धव ठाकरे यांनी काही दिवसांपूर्वी निर्बंध लादल्यानंतर व्यापारी वर्गाकडून मोठी नाराजी व्यक्त करण्यात आली होती. लॉकडाऊनमुळे उद्योग-धंद्यांवर विपरीत परिणाम होतो. त्यामुळे करोनाचं संकट गडद होत असतानाही सरकारने कडक लॉकडाऊन करणं आतापर्यंत टाळलं आहे. मात्र करोनाच्या दुसऱ्या लाटेला अनेक दिवस लोटल्यानंतर रुग्णांची संख्या फारशी कमी होत असल्याने सरकारकडून कडक लॉकडाऊनचा विचार केला जाऊ शकतो. करोना लढ्याचं नेतृत्व करण्याच्या प्रश्नावर नितीन गडकरी म्हणाले... पुण्यात अजूनही अनेक ठिकाणी आरोग्य सुविधांचा तुटवडा जाणवत आहे. या पार्श्वभूमीवर आजच्या बैठकीत कडक लॉकडाऊनचा निर्णय घेण्यात आला तर संभाव्य लॉकडाऊनची अंमलबजावणी कशी करायची, याबाबतही चर्चा होऊ शकते. त्यामुळे या महत्त्वपूर्ण बैठकीत नेमका काय निर्णय होतो, हे पाहणं महत्त्वाचं ठरणार आहे.
