मियामी: फ्लोरिडामध्ये मियामी समुद्र किनाऱ्याजवळील एका १२ मजली इमारतीचा भाग कोसळला. या घटनेत एका व्यक्तीचा मृत्यू झाला असून आणखी ९९ जण बेपत्ता असल्याची माहिती समोर आली आहे. गुरुवारी संध्याकाळच्या सुमारास ही घटना घडली. मदत आणि बचाव पथकाने जवळपास १०२ जणांची सुखरूप सुटका केली आहे. ढिगाऱ्याखाली अडकलेल्या लोकांच्या सुटकेसाठी अग्निशमन दलासह पोलीस यंत्रणाही प्रयत्न करत आहे. मृतांची संख्या वाढण्याची भीती व्यक्त केली जात आहे. मियामी किनाऱ्याजवळील शॅम्लेन टॉवर्स ही इमारत १२ मजली असून १३० हून अधिक युनिट असल्याची माहिती महापौरांनी दिली. इमारतीमधील प्रत्येकाची सुटका होईपर्यंत मदत आणि बचाव कार्य सुरू राहणार असल्याची माहितीही त्यांनी दिली. काहीजण गंभीर जखमी झाल्याची माहिती अग्निशमन दलाच्या अधिकाऱ्यांनी दिली. उपचारासाठी त्यांना स्थानिक रुग्णालयात दाखल करण्यात आले आहे. वाचा: इमारत कोसळण्याचे कारण काय? इमारत कोसळण्याचे कारण अद्याप समोर आले नसल्याचे महापौरांनी सांगतिले. स्ट्रक्चरल इंजिनियरच्या एका पथकाकडून याची चौकशी करण्यात येणार आहे. या चौकशीमध्ये स्थानिक अग्निशमन दलही मदत करणार आहे. ही इमारत १९८० च्या दशकात उभारत आली होती. या इमारतीच्या छताचे काम सुरू होते. मात्र, त्यामुळे इमारत कोसळली असावी असे वाटत नसल्याचे त्यांनी सांगितले. वाचा: ढिगाऱ्यातून मदतीसाठी आवाज कोसळलेल्या इमारतीच्या ढिगाऱ्यात अडकलेल्या लोकांचा मदतीसाठी आवाज येत असल्याचे अग्निशमन दलाच्या जवानांनी सांगितले. पार्किंग गॅरेजच्या भागातून अधिक आवाज येत असल्याचे अधिकाऱ्यांनी सांगितले. अग्निशमन आणि बचाव पथकाच्या जवानांकडून लोकांना वाचवण्याचे प्रयत्न सुरू आहेत. ढिगाऱ्याखाली अडकलेल्या लोकांचा शोध घेण्यासाठी श्वान पथकाचीही मदत घेतली जात आहे.
