कोलकाताः पश्चिम बंगालच्या मालदा जिल्ह्यात अलिकडेच भारतात घुसखोरीचा प्रयत्न ( ) झाला. यावेळी सुरक्षा दलांनी कारवाई करत घुसखोरी करणाऱ्या चिनी नागरिकाला अटक केली. या चिनी नागरिकाच्या चौकशीत मोठी माहिती उघड झाली आहे. भारताच्या विविध संस्था आणि संरक्षण मंत्रालयासह केंद्र सरकारच्या वेगवेगळ्या वेबसाइट हॅक करण्याचा प्रयत्न चीनकडून केला जात असल्याची धक्क्दायक माहिती चौकशीत घुसखोर चिनी नागरिकाने दिली आहे. या प्रकरणी चौकशी करत असलेल्या विशेष कृती दलाच्या (STF) सूत्रांनी मंगळवारी ही माहिती दिली. भारत-बांगलादेश सीमेवरून भारतात घुसखोरीच्या प्रयत्नात असलेला चिनी नागरिक हैन जुनवे याला अटक करण्यात आली. त्याची चौकशी करण्यात येत आहे. चीनचे हॅकर्स हे बेंगळुरुतील एका आयटी कंपनीला लक्ष्य केले आहे. ही कंपनी मंत्रालय आणि बीएसएनएलसोबत काम करत आहे, अशी माहिती चौकशीत चिनी नागरिकाने दिली. भारताच्या संरक्षण यंत्रणेत घुसखोरीचा डाव एअरोस्पेस कंपन्याही चिनी हॅकर्सच्या निशाण्यावर आहेत. चीनच्या संस्था या भारताच्या संरक्षण यंत्रणेत घुसखोरीचा प्रयत्न करत आहेत. यामुळे चीन भारताच्या संरक्षण मंत्रालयासह विविध वेबसाइट हॅक करण्याचा प्रयत्न करत आहेत, असं एसटीएफमधील एका अधिकाऱ्याने सांगितलं. भारतात घुसखोरी कशासाठी? याचा तपास सुरू जुनवेचा हॅकर्स संस्थांशी असलेल्या संबंधांचा तपास केला जात आहे. भारतात घुसखोरी करण्याचा मागचा हेतू काय होता? तसंच अटक करण्यात आलेल्या चिनी नागरिकाचा बंदी घातलेल्या नक्षलवादी संघटनांशी काही संबंध आहे का? अशा सर्व बाजूंनी घुसरखोर चिनी नागरिक जुनवे याची चौकशी केली जात असल्याचं अधिकाऱ्याने सांगितलं. मोबाइल फोन आणि लॅपटॉप अनलॉक करण्याचा प्रयत्न घुसखोरीच्या प्रयत्नात असलेल्या चिनी नागरिकाला १२ जूनला अटक करण्यात आली. त्याच्याकडून मोबाइल फोन आणि लॅपटॉप जप्त करण्यात आला. त्या फोन आणि लॅपटॉप अनलॉक करण्याचा प्रयत्न सुरू आहे.
