नवी दिल्ली : करोनाच्या दुसऱ्या लाटेची तीव्रता लक्षात घेता केंद्र सरकारने अल्प बचत योजनांच्या व्याजदरात कोणताही बदल केलेला नाही. १ जुलै २०२१ ते ३० सप्टेंबर २०२१ या दुसऱ्या तिमाहीत 'पीपीएफ', नॅशनल सेव्हिंग सर्टिफिकेट, सुकन्या समृद्धी योजनेसह इतर अल्प बचतीच्या योजनांचे व्याजदर पहिल्या तिमाही प्रमाणेच कायम राहणार आहेत. व्याजदर 'जैसे थे' ठेवल्याने कोट्यवधी गुंतवणूकदारांना दिलासा मिळाला आहे. दुसऱ्या तिमाहीमध्ये सार्वजनिक भविष्यनिर्वाह निधीसह (पीपीएफ) सर्व अल्पबचत योजनांचे व्याजदर पहिल्या तिमाहीप्रमाणेच ठेवले आहेत. दरम्यान, पहिल्या तिमाहीत सरकारने अल्प बचतीच्या विविध योजनांच्या व्याजदर कपात केली होती. त्यामुळे गुंतवणूकदारांमध्ये नाराजी निर्माण झाली होती. अर्थ मंत्रालयाच्या आर्थिक व्यवहार विभागाकडून आज बुधवारी रात्री अल्प बचत योजनांचे दुसऱ्या तिमाहीतील व्याजदरांचे परिपत्रक जारी करण्यात आले. त्यानुसार या गुंतवणूक योजनांच्या व्याजदरात कोणताही बदल करण्यात आलेला नाही. अल्प बचतीच्या गुंतवणूक योजनांचे व्याजदर १ जुलै २०२१ ते ३० सप्टेंबर २०२१ पर्यंत कायम राहतील. त्यानुसार 'पीपीएफ'वर ६.४ टक्के व्याज मिळेल. नॅशनल सेव्हिंग सर्टिफिकेटवरील (NSC) ५.९ टक्के व्याजदर आहे. सुकन्या समृद्धी योजनेवर ६.९ टक्के व्याज आहे. बचत ठेवीचा व्याजदर ३.५ टक्के आहे. पोस्टाच्या मुदत कालावधीच्या ठेवींवर (Post Office Time Deposit) ४.४ टक्के ते ५.३ टक्क्यांच्या दरम्यान व्याज मिळेल. ज्येष्ठ नागरिकांच्या बचत योजनांवरील व्याजाचा दर ६.५ टक्के आहे. किसान विकास पत्रावरील व्याजदर घटवून ६.९ टक्क्यांवरून ६.२ टक्के करण्यात आला आहे. करोनाच्या दुसऱ्या लाटेचा परिणाम भांडवल बाजारांसह संपूर्ण अर्थव्यवस्थेवर दिसून येत असून खेळत्या पैशाचे प्रमाण कमी झाले आहे. आर्थिक उलाढाल जवळजवळ बंद झाली असून त्यामुळे सर्वसामान्यांपासून बड्या उद्योगसमूहांपर्यंत सारे चिंतेत आहेत. करोनामुळे कराव्या लागलेल्या लॉकडाउनमध्ये अनेकांना वेतनकपात, रोजगार नसणे यांसारख्यास्थितीला सामोरे जावे लागले आहे. करोना संकटात सलग तीन तिमाही व्याजदर होते स्थिर करोना संकटात गेल्या वर्षी सलग तीन तिमाहीत सरकारने अल्प मुदतीचे व्याजदर स्थिर ठेवले होते. त्यानंतर चालू आर्थिक वर्षाच्या पहिल्या तिमाहीत 'पीपीएफ'सह इतर अल्प बचतीच्या योजनांवरील व्याजदरात मोठी कपात केली होती. यामुळे 'पीपीएफ'चा व्याजदर १९७४ नंतर प्रथमच ७ टक्क्यांखाली घसरला होता.
