म. टा. विशेष प्रतिनिधी, मुंबई भंगार गोळा करणाऱ्यांचा चोरटा प्रवेश, दारूडे, गर्दुल्ल्यांची घुसखोरी यांमुळे देवनार डम्पिंग ग्राऊंडच्या सुरक्षेचा प्रश्न निर्माण झाला आहे. तसेच डम्पिंग परिसरात मोठ्या प्रमाणात झोपड्यांचे अतिक्रमण होत आहे. ते रोखण्यासाठी मुंबई महापालिकेने मोबाइल हायमास्ट (फिरते प्रखर दिवे) बसवण्याचा निर्णय घेतला आहे. या कामासाठी पहिल्या टप्प्यात ४०० दिवसांसाठी कंत्राट देण्यात येणार आहे. हा प्रयोग यशस्वी ठरल्यास दिव्यांची संख्या आणखी वाढवली जाणार आहे. मुलुंड डम्पिंग ग्राऊंड बंद झाल्यामुळे मुंबईतील ९० टक्के म्हणजे दररोज सुमारे साडेपाच हजार ते सहा हजार मेट्रिक टन कचरा कांजुर डम्पिंग ग्राऊंडवर टाकला जात आहे. उच्च न्यायालयाने बंद करण्याचे आदेश दिल्याने येथे दर दिवशी सुमारे ७०० मेट्रिक टन कचरा आणि १५०० मेट्रिक टन इमारत बांधकामांचे डेब्रिज टाकले जाते. मुंबईतील सर्वांत जुने आणि तब्बल १२० हेक्टर क्षेत्रफळावर असलेल्या देवनार डम्पिंग ग्राऊंडची कचरा सामावून घेण्याची क्षमता संपुष्टात आली आहे. त्यामुळे पालिका आता नवीन डम्पिंग ग्राऊंडसाठी जागेच्या शोधात आहे. देवनार डम्पिंग ग्राऊंडलगत मोठ्या प्रमाणात झोपडपट्ट्या असून, तेथून डम्पिंग परिसरात वारंवार अतिक्रमण होत आहे. रात्री अंधाराचा फायदा घेऊन डम्पिंगलगतच्या जमिनी झोपड्यांनी व्यापण्याचे प्रकार वाढत आहेत. परिसराला संरक्षक भिंतीचे जाळे असले तरी भिंती फोडून चोरटे, भिकारी, गर्दुल्ले आत शिरण्याचा प्रयत्न करतात. कचऱ्याला लागणाऱ्या आगींमुळे डम्पिंग ग्राऊंडच्या सुरक्षेसाठी पालिका विविध पातळ्यांवर उपाययोजना करत आहे. याचा एक भाग म्हणून मोबाइल हायमास्ट दिव्यांचा पर्याय काढण्यात आला आहे. पालिकेने मोबाइल हायमास्ट सेवा भाडेतत्त्वावर घेण्याचा निर्णय घेतला आहे. यासाठी निविदाप्रक्रिया राबविण्यात आली होती. यात एक कोटी २० लाख रुपये दराने निविदा भरणाऱ्या जय मल्हार हायरिंग सर्विसेस कंपनीला हे कंत्राट मंजूर झाले आहे. इतर कंत्राटदारांच्या तुलनेत जय मल्हार कंत्राटदाराने २५.२० टक्के कमी दरात काम करण्याची तयारी दर्शवली आहे. त्यामुळे पालिकेचे २५ लाखांहून अधिक रकमेची बचत होणार आहे. शिफ्टसाठी दोन हजार ६०७ रुपये कंत्राटदाराला सायंकाळी सहा ते पहाटे सहा या १२ तासांच्या एका शिफ्टसाठी दोन हजार ६०७ रुपये देण्यात येणार आहेत. स्थायी समितीने या प्रस्तावाला मंजुरी दिली आहे.
