मुंबई : भांडवली बाजारात आज ऑगस्ट महिन्याच्या पहिल्याच सत्रात सेन्सेक्स आणि निफ्टीने दमदार सुरुवात केली आहे. आज बाजार सुरु होताच गुंतवणूकदारांनी चौफेर खरेदी केल्याने सेन्सेक्स ३०० अंकांनी वधारला तर निफ्टीत ९० अंकाची वाढ झाली आहे. सेन्सेक्स मंचावरील २७ शेअर तेजीत आहेत तर ३ शेअरमध्ये घसरण झाली आहे. पॉवरग्रीड, टेक महिंद्रा आणि एनटीपीसी या शेअरमध्ये घसरण झाली आहे. तर मारुती, ऍक्सिस बँक, टायटन, महिंद्रा अँड महिंद्रा, इंडसइंड बँक, आयसीआयसीआय बँक, आयटीसी, एचडीएफसी बँक, एचडीएफसी, डॉ. रेड्डी लॅब, कोटक बँक, एल अँड टी, एचयूएल या शेअरमध्ये वाढ झाली आहे. जुलै महिन्यातील दिलासादायक आकडेवारी आणि अर्थव्यवस्था सावरू लागल्याने आज वाहन उत्पादक कंपन्यांचे शेअर तेजीत दिसून आले. अशोक लेलँड, मारुती सुझुकी, टाटा मोटर्स, आयशर मोटर्स, महिंद्रा अँड महिंद्रा या शेअरमध्ये वाढ झाली आहे. निफ्टीवर सर्वच क्षेत्रीय निर्देशांकात वाढ झाली आहे. ज्यात निफ्टी ऑटो आणि निफ्टी रियल्टी निर्देशांकात वाढ झाली आहे. चालू आर्थिक वर्षात परदेशी संस्थात्मक गुंतवणूकदारांनी ६१०५ कोटींची विक्री केली आहे. करोनाची दुसरी लाट, डेल्टा व्हेरिएंट आणि लॉकडाउन यामुळे परदेशी गुंतवणूकदारांनी नफावसुली करून गुंतवणूक काढून घेण्याला प्राधान्य दिले. एप्रिल ते जुलै या कालावधीत सेन्सेक्स मात्र ३०७७ अंकांनी वाढला आहे. आज आशियातील भांडवली बाजारांनी सकारात्मक सुरवात केली. टोकियोमध्ये निक्केई निर्देशांक २२१ अंकांनी वधारला. हाँगकाँगमधील हँगसेंग निर्देशांकात ९३ अंकांची वाढ झाली. शांघाय कंपोझिट इंडेक्स ११ अंकांनी घसरला आहे. सिंगापूर निफ्टीत ११५ अंकांनी वाढ झाली आहे. सध्या मुंबई शेअर बाजाराचा सेन्सेक्स २८९ अंकांनी वधारला असून तो ५२८७६ अंकावर आहे. राष्ट्रीय शेअर बाजाराचा निफ्टी ९२ अंकांनी वधारून १५८५५ अंकावर आहे. आजच्या तेजीने गुंतवणूकदारांची मालमत्ता ५० हजार कोटींनी वधारली असल्याचे बोलले जाते.
