म. टा. प्रतिनिधी, सरकारी कर्मचाऱ्यांप्रमाणे एसटी कर्मचाऱ्यांना २८ टक्के महागाई भत्ता, तर पदांच्या श्रेणीनुसार घरभाडे भत्ता अनुक्रमे ८ टक्के, १६ टक्के आणि २४ टक्के, असा मंजूर करण्यात आला आहे. त्यामुळे गेल्या ४८ तासांपासून सुरू असलेले एसटी कामगारांचे उपोषण परिवहनमंत्री तथा एसटी महामंडळाचे अध्यक्ष यांच्या उपस्थितीत मागे घेण्यात आले. संयुक्त कृती समितीने गुरुवारी रात्री याची घोषणा केली. उपोषण सुटल्याने अघोषित संपही मागे घेण्यात आला. यामुळे सणासुदीच्या काळात राज्याची जीवनवाहिनी असलेली एसटी पुन्हा एकदा प्रवासी सेवेत रुजू झाली आहे. एसटी महामंडळाचे राज्य सरकारमध्ये विलीनीकरण करण्याच्या मुद्द्यावरून संयुक्त कृती समितीने राज्यव्यापी उपोषणाची घोषणा केली होती. त्यानुसार एसटी कामगारांनी २५०पैकी २००हून अधिक आगार बंद केले. मात्र, प्रत्यक्षात हा मुद्दा वगळून कृती समितीने महागाई भत्ता आणि घरभाडे भत्तावाढ यावर मंत्री अनिल परब यांच्याशी चर्चा केली. यामुळे आमच्या तोंडाला समितीने पुन्हा एकदा पाने पुसली आहेत, अशी भावना कर्मचाऱ्यांनी व्यक्त केली आहे. राज्यातील २००हून अधिक आगार बंद असल्याने सामान्य नागरिकांना मोठ्या प्रमाणात अडचणींचा सामना करावा लागला होता. एसटी संप वाढल्यास संबंधित ठिकाणी खासगी वाहतूकदारांना परवानगी देण्याच्या हालचाली प्रशासकीय पातळीवर सुरू करण्यात आल्या होत्या. मात्र, परब यांच्या नेतृत्वाखाली झालेल्या चर्चेमुळे सामान्य नागरिकांची एसटीसेवा पूर्ववत झाली. संयुक्त कृती समितीने सन २०१८मधील दिवाळीत संप पुकारला होता. तत्कालीन परिवहनमंत्री दिवाकर रावते यांनी हा संप सोडवला. यावेळी सरकारी कर्मचाऱ्यांप्रमाणे एसटी कर्मचाऱ्यांना भत्ते देणे मान्य करण्यात आले होते. आता ऑक्टोबरपासून म्हणजेच १ नोव्हेंबरला होणाऱ्या पगारात एसटी कर्मचाऱ्यांना हे लाभ मिळतील. सन २०१८ ते २०२१ या काळातील थकबाकीची रक्कम एसटी कर्मचाऱ्यांना मिळणार नाही, अशी माहिती कामगार संघटनांतील नेत्यांनी दिली. घरभाडे पद श्रेणीनुसार अनुक्रमे ८ टक्के, १६ टक्के आणि २४ टक्के असे मंजूर करण्यात आले आहे. यापूर्वी घरभाडे ७ टक्के, १४ टक्के आणि २१ टक्के इतके होते. उपोषणातील मागण्या मान्य झाल्याने संप मागे घेण्यात आल्याचे काँग्रेसचे सरचिटणीस श्रीरंग बरगे यांनी सांगितले. ..... सरकारी कर्मचाऱ्यांप्रमाणे एसटी कर्मचाऱ्यांना २८ टक्के महागाई भत्ता, तसेच वाढीव घरभाडे भत्ता देण्यात येणार आहे. वार्षिक वेतनवाढ दोन टक्क्यांवरून तीन टक्के करण्यासाठी दिवाळीनंतर स्वतंत्र बैठक घेण्यात येईल. - अनिल परब, परिवहन मंत्री आणि अध्यक्ष, एसटी महामंडळ .............
