म. टा. वृत्तसेवा, उरण माथेरानमधील शिवसेनेतून भाजपमध्ये प्रवेश केलेल्या दहा नगरसेवकांवर पक्षांतर कायद्यानुसार कारवाई करीत अपात्र ठरविण्यात आले आहे. रायगडचे जिल्हाधिकारी डॉ. महेंद्र कल्याणकर यांनी ही कारवाई केली आहे. माथेरान नगरपरिषदेच्या सन २०१६च्या निवडणुकीमध्ये शिवसेनेने १४ नगरसेवक आणि दोन स्वीकृत नगरसेवक मिळून एकहाती सत्ता मिळविली होती. यामध्ये राष्ट्रवादी काँग्रेसचे दोन आणि काँग्रेसचे एक नगरसेवक निवडून आले होते. दरम्यान, शिवसेनेतील अंतर्गत वादामुळे सुमारे चार वर्षांनी शिवसेनेच्या दहा नगरसेवकांनी मे २०२१मध्ये भाजपमध्ये प्रवेश केला होता. यावेळी, या दहा नगरसेवकांनी भाजपचे प्रदेशाध्यक्ष चंद्रकांत पाटील यांची कोल्हापूर येथे भेट घेऊन भाजपमध्ये प्रवेश केला होता. तर, शिवसेनेच्या सहा महिला नगरसेवकांसह भाजपमध्ये प्रवेश केलेल्या नगरसेवकांविरोधात पक्षांतर्गत कायद्यान्वये माथेरान नगरपरिषदेचे शिवसेनेचे गटनेते प्रसाद सावंत यांनी रायगडचे जिल्हाधिकारी यांच्याकडे अर्ज करण्यात आला होता. यासंदर्भात, दोन्ही बाजूची सुनावणी झाल्यानंतर शुक्रवारी यासंदर्भात निकाल देत जिल्हाधिकारी डॉ. महेंद्र कल्याणकर यांनी भाजपमध्ये प्रवेश केलेल्या रूपाली आखाडे, प्रियांका कदम, ज्योती सोनावले, संदीप कदम, प्रतिभा घावरे, आकाश चौधरी, सुषमा जाधव, राकेश चौधरी, सोनम दाभेकर आणि स्वीकृत सदस्य चंद्रकांत जाधव या दहा नगरसेवकांना अपात्र ठरविण्यात आले आहे.
