इस्लामाबाद: ‘द फायनान्शियल अॅक्शन टास्क फोर्स’ (एफएटीएफ) या दहशतवाद्यांची आर्थिक नाकेबंदी करणाऱ्या आंतरराष्ट्रीय संघटनेने पाकिस्तानसह तुर्कीलाही झटका दिला आहे. 'एफएटीएफ'ने पाकिस्तानला करड्या यादीत (ग्रे लिस्ट) कायम ठेवले असून तुर्कीचाही समावेश या यादीत केला आहे. विशेष म्हणजे, पाकिस्तानला करड्या यादीतून बाहेर काढण्यासाठी तुर्कीचे प्रयत्न सुरू होते. 'एफएटीएफ'ने भारताच्या दबावात येऊन आमच्याविरोधात हे पाऊल उचलले असल्याचा आरोप पाकिस्तानने केला. मात्र, 'एफएटीएफ'ने हे आरोप फेटाळून लावले. एफएटीएफचे अध्यक्ष डॉ. मार्क्स प्लिअर यांनी म्हटले की, दहशतवादी आणि त्यांच्या संघटनांविरोधात गंभीरपणे कारवाई करत असल्याचे पाकिस्तानला दाखवावे लागणार आहे. एफएटीएफमध्ये निर्णय सर्वसंमतीने होतात असेही त्यांनी सांगितले. पाकिस्तानने ३४ अॅक्शन पॉईंटपैकी ३० पॉईंट पूर्ण केले आहेत. पाकिस्तान, तुर्कीच्या अडचणी वाढणार तुर्की आणि पाकिस्तानचा एफएटीएफच्या करड्या यादीत समावेश झाल्याने त्यांच्यासमोरील आर्थिक अडचणीत वाढ होण्याची शक्यता आहे. अन्य देशांकडून, आंतरराष्ट्रीय वित्तीय संस्थांना तुर्कीला आर्थिक मदत मिळणेही कठीण होऊ शकते. पाकिस्तानने या करड्या यादीतून बाहेर पडण्यासाठी अनेक प्रयत्न केले. मात्र, त्यांना अद्याप यश आले नाही. करड्या यादीत असल्यामुळे पाकिस्तानला आर्थिक मदत मिळण्यास अडचणींचा सामना करावा लागत आहे. पाकिस्तानची आर्थिक परिस्थिती आधीच बिकट असताना एफएटीएफच्या निर्णयामुळे त्यांना धक्का बसला आहे.
