मुंबई : सत्तास्थापन केल्यानंतर राज्याचे मुख्यमंत्री एकनाथ शिंदे यांनी राज्य खड्डेमुक्त करण्याची महत्त्वाकांक्षी योजना जाहीर केली होती. पावसाळ्यात मुंबईतील खड्ड्यांनी वाहनचालकांना जेरीस आणले होते आणि शहरांत अभूतपूर्व वाहतूककोंडी होत होती. मात्र, मुख्यमंत्र्यांच्या घोषणेनंतर निर्विघ्न प्रवासासाठी अपेक्षा करत असलेल्या मुंबईकरांचा प्रवाह सुसह्य होणे लांबणीवर पडले आहे. मुंबईतील सुमारे ४०० किमी लांबीच्या रस्त्यांचे काँक्रिटीकरण करण्यासाठी महापालिका प्रशासनाने मागवलेल्या निविदांना अत्यल्प प्रतिसाद मिळाल्याने त्या रद्द करण्याचा निर्णय घेण्यात आला आहे. महापालिकेने ऑगस्ट २०२२ मध्ये ५ हजार ८०६ कोटींच्या निविदा मागवल्या होत्या. या पाच निविदांना अत्यल्प प्रतिसाद मिळाल्याने निविदा रद्द करण्याचा निर्णय प्रशासनाने घेतला आहे. या कामांसाठी आता पुन्हा नव्याने निविदा मागवण्यात येणार आहेत. त्यापूर्वी निविदांच्या अटी व शर्तींचे पुनर्विलोकन करण्यात येईल, तसेच गुणवत्तेशी कोणतीही तडजोड न करता जलदगतीने कामे करणे, अत्याधुनिक तंत्रज्ञानाचा समावेश करणे या दृष्टीने निर्णय घेऊन नवीन निविदा मागविणे संयुक्तिक ठरेल, असे प्रशासनाने स्पष्ट केले आहे. मुंबई महापालिका क्षेत्रातील रस्ते सुधारणा व मुंबईतील रस्ते एक वर्षात खड्डेमुक्त करण्याच्या दृष्टीने पालिकेने सुमारे ४०० किमी लांबीच्या रस्त्यांचे सिमेंट काँक्रिटीकरण करण्यासाठी एकूण पाच निविदा २ ऑगस्ट २०२२ रोजी मागवल्या होत्या. यामध्ये शहर १, पूर्व उपनगरे १ आणि पश्चिम उपनगरे ३ अशा एकूण पाच निविदांचा समावेश होता. रस्त्यांच्या कामाची गुणवत्ता व दर्जा उत्तम राखण्यासाठी या निविदांमध्ये मोठ्या नामांकित कंपन्या समाविष्ट होण्यासाठी निविदा प्रक्रियेत कठोर अटी व शर्ती समाविष्ट करण्यात आल्या होत्या. काम जलद गतीने पूर्ण करण्यासाठी प्रथमच प्रिकास्ट पर्जन्यवाहिन्या व उपयोगिता सेवा वाहिन्यांसाठी भूमिगत प्रिकास्ट डक्ट व प्रिकास्ट मॅनहोल तसेच इतर अत्याधुनिक तंत्रज्ञानाचा अंतर्भाव करून नवीन निविदा तातडीने मागविण्याचे प्रशासनाने ठरविले आहे. प्रिकास्ट पर्जन्य जलवाहिन्या, प्रिकास्ट डक्ट व प्रिकास्ट मॅनहोल यांचा अंतर्भाव केल्याने कामाची गुणवत्ता सुधारण्यास आणखी मदत होणार आहे. कामासाठी लागणाऱ्या वेळेची अधिक बचत होऊन काम लवकरात लवकर पूर्ण होण्यास मदत होईल. या सर्व कारणांनी नवीन निविदा मागविणे संयुक्तिक ठरणार असल्याची माहिती पालिकेच्या वतीने देण्यात आली आहे.
