म. टा. विशेष प्रथिनिधी, मुंबई : पेन्शनच्या मागणीसाठी सुरू असलेल्या संपाचा फटका बुधवारी रुग्णालयांना बसला. मुंबईतील सार्वजनिक रुग्णालयांमध्ये उपनगरांतून तसेच राज्याच्या कानाकोपऱ्यांतून उपचारांसाठी आलेल्या रुग्णांचे त्यामुळे हाल झाले.केमोथेरपीसाठी आलेले, तसेच रुग्णालयांमध्ये दाखल होण्याची गरज असलेल्या रुग्णांना रुग्णालयामध्ये तत्काळ वैद्यकीय सेवा मिळाली नाही. संपाची पूर्वकल्पना नसलेले वयोवृद्ध रुग्ण, गर्भवती महिला यांच्यासोबत आलेल्या कुटुंबीयांचे रुग्णालय प्रशासनातील अधिकाऱ्यांसोबत वाद झाले. काही रुग्णालयांमध्ये वरिष्ठ परिचारिकांनी कर्तव्य बजावले. तर डॉक्टरांनी पूर्णवेळ थांबून वैद्यकीय सेवा दिली. संप सुरू राहिला तर नियोजन कसे करायचे यासंदर्भात बुधवारी रात्री उशिरापर्यंत बैठक सुरू होती. वैद्यकीय सेवा या आपत्कालीन सेवांमध्ये येतात. त्यामुळे कर्मचाऱ्यांनी रुग्णांचा सहानभुतीपूर्वक विचार करावा, ही भावना व्यक्त झाली. बुधवारीही नियोजित शस्त्रक्रिया होऊ शकल्या नाहीत. व्हायरल संसर्गाचा जोर हळूहळू वाढत असल्याने रुग्णालयांमध्ये विलगीकरण कक्षाची निर्मिती, तीव्र स्वरूपाची लक्षणे असलेल्या रुग्णांना दाखल करण्याची गरज पडू शकते. त्यादृष्टीने रुग्णालयामध्ये नियोजन करण्याची गरज आहे. कामा रुग्णालयाचे वैद्यकीय अधीक्षक डॉ. तुषार पालवे यांनी इस्कॉनच्या मदतीने रुग्णालयात जेवणाची व्यवस्था केली होती. कंत्राटी कर्मचाऱ्यांच्या मदतीने सफाई काम करण्यात आले. रुग्णालयांतील अंतर्गत व्यवस्थेवर व रुग्णसेवेवर संपाचा अधिक परिणाम होण्याची भीती आहे. पालिकेच्या आरोग्य विभागाकडून परिचारिका तसेच इतर कर्मचाऱ्यांची उपलब्धता करण्याच्या दृष्टीनेही प्रय़त्न सुरू असल्याचे कळते.
