बंडू येवले, लोणावळा : मावळ तालुक्यातील कामशेत रेल्वे स्थानकावर वर्दळीच्या ठिकाणी रविवारी भर दुपारी १२ वाजता एका २५ वर्षीय युवकाचा धारदार शस्त्राने खून करण्यात आला. या खून प्रकरणातील आरोपीला कामशेत पोलिसांनी अवघ्या तीन ते चार तासांत जेरबंद करत अटक केली आहे. कामशेत रेल्वे स्टेशनवर भरदिवसा वर्दळीच्या वेळी घडलेल्या घटनेमुळे परिसरात खळबळ उडाली आहे.विजय सतू भोंडवे (वय- २५, रा. भाजगाव, नाणे मावळ) असं खून झालेल्या युवकाचं नाव आहे. तर संतोष महादेव घाटे (फिरस्ता रा.कामशेत, मावळ, मूळ. रा. अमरावती) याला अटक करण्यात आली आहे.कामशेत पोलिसांनी दिलेल्या माहितीनुसार, कामशेत रेल्वे स्थानकावरील मुंबई-पुणे लोहमार्गिकेवर रेल्वे प्लॅटफॉर्मवर रविवारी दुपारी १२ वाजण्याच्या सुमारास एका युवकाचा खून झालेल्या अवस्थेत मृतदेह आढळला. या घटनेने परिसरात एकच खळबळ उडाली होती. तसेच नागरिकांमध्ये भीतीचे वातावरण पसरले होते. या घटनेची माहिती मिळताच कामशेत पोलीस व लोहमार्ग पोलिसांनी घटनास्थळी धाव घेत घटनेची पाहणी केली. कामशेत रेल्वे स्टेशनवर सीसीटीव्ही कॅमेरे नसल्याने व या घटनेबाबत कोणतीही ठोस माहिती नसल्यामुळे आरोपीचा शोध घेणे, हे एक मोठे आव्हान कामशेत पोलिसांपुढे होते. लोणावळा उपविभागीय पोलीस अधिकारी आयपीएस सत्यसाई कार्तिक यांनी कामशेत पोलीस ठाण्यात जाऊन या घटनेची माहिती घेतली. या प्रकरणी काही तांत्रिक बाबी व नागरिकांच्या मदतीच्या आधारे सत्यसाई कार्तिक यांच्या मार्गदर्शनाखाली कामशेतचे निरीक्षक संजय जगताप, सहायक फौजदार अब्दुल शेख, सहायक फौजदार समीर शेख, पोलीस हवालदार गणेश तावरे, सुहास सातपुते, एस. डोईफोडे, होमगार्ड सुधीर घारे यांच्या पथकाने खून करून निघून गेलेल्या आरोपीच्या अवघ्या ३ ते ४ तासात मुसक्या आवळत त्याला ताब्यात घेत अटक करण्यात आली आहे. तसेच त्याच्यासोबत त्याचे इतर दोन साथीदार असल्याची माहिती पोलिसांना मिळाली आहे. पोलीस त्यांचाही शोध घेत आहेत. दरम्यान, कामशेत पोलिसांनी आरोपी संतोष महादेव घाटे याला पुणे लोहमार्गाच्या स्थानिक गुन्हे शाखेच्या ताब्यात दिले आहे. या घटनेचा पुढील तपास आरपीएफ पोलीस ठाणे चिंचवड हे करत आहेत.
