म. टा. खास प्रतिनिधी, मुंबईः मानखुर्दच्या मंडाळा परिसरात दोन कुटुंबांमध्ये झालेल्या वादातून एकाने केलेल्या गोळीबारात महिलेचा मृत्यू झाला. फरझाना असे मृत महिलेचे नाव आहे. तिच्यावर गोळीबार करणाऱ्यांचा शोध सुरू असल्याचे पोलिसांनी सांगितले.मंडाळा परिसरात शेख आणि सिंग ही दोन कुटुंबे वास्तव्यास आहेत. शनिवारी सायंकाळी दोन कुटुंबांतील महिलांमध्ये जुन्या कारणावरून भांडण झाले. हे भांडण इतके वाढले की, यामध्ये कुटुंबातील पुरुषही सहभागी झाले. यावेळी भांडणाचे पर्यावसान हाणामारीत झाले. सिंग कुटुंबातील सोनू व त्याच्या मुलाने पिस्तुल काढले आणि गोळीबार केला. यामध्ये फरझाना (३१) ही महिला गंभीर जखमी झाली. तिला उपचारासाठी राजावाडी रुग्णालयात नेण्यात आले. दाखल करण्यापूर्वीच डॅाक्टरांनी तिला मृत घोषित केले. घटनेची माहिती मिळताच मानखुर्द पोलिस, तसेच पोलिस दलातील वरिष्ठ पोलिस अधिकारी घटनास्थळी दाखल झाले. गोळीबारानंतर हल्लेखोर पसार झाले असून प्रत्यक्षदर्शींनी दिलेल्या माहितीनुसार, मानखुर्द पोलिस ठाण्यात हत्येचा गुन्हा दाखल करण्यात आला. आरोपींची ओळख पटली असून त्यांचा शोध घेत असल्याचे पोलिस उपायुक्त हेमराजसिंग रजपूत यांनी सांगितले.
