नवी दिल्ली: चेन्नई सुपर किंग्जने त्यांच्या अखेरच्या साखळी फेरीतील लढती दिल्ली कॅपिटल्सचा ७७ धावांनी पराभव केला. या विजयासह चेन्नईने आयपीएल २०२३च्या प्लेऑफमध्ये स्थान पक्के केले. प्रथम फलंदाजी करणाऱ्या चेन्नईने २२३ धावा केल्या होत्या उत्तरादाखल दिल्लीला फक्त १४६ धावा करता आल्या. चेन्नईच्या या विजयात एका मोठ्या विक्रमाची नोंद झाली आहे. शनिवारी झालेल्या लढतीत फक्त चेन्नई संघाने नाही तर दिल्ली संघाचे नेतृत्व करणाऱ्या डेव्हिड वॉर्नरने देखील अखेरच्या साखळी लढतीत कमाल केली. धोनीच्या नेतृत्वाखाली खेळणाऱ्या सीएसकेने विक्रमी १२व्यांदा आयपीएलच्या प्लेऑफमध्ये स्थान मिळवले आहे. या संघाने आतापर्यंत १४ हंगाम खेळले आहेत आणि त्यापैकी फक्त २ वेळा त्यांना प्लेऑफमध्ये जाता आले नाही. अशी कामगिरी अन्य एकाही संघाला करता आली नाही. दिल्ली कॅपिटल्सविरुद्ध चेन्नईने २०० धावा केल्या. या सामन्यात चेन्नईने एक मोठा विक्रम स्वत:च्या नावावर केला. आयपीएलमध्ये २८व्यांदा २००हून अधिक धावा केल्या आहेत. याबाबत दुसऱ्या स्थानावर रॉयल चॅलेंजर्स बेंगळुरूचा संघ आहे त्यांनी २४ वेळा अशी कामगिरी केली आहे. चेन्नईचा सलामीवीर ऋतुराज गायकवाडने या हंगामात ५०० हून अधिक धावा केल्या आहेत. यासह तो चेन्नईचा पहिला सलामीवीर ठरला आहे ज्याने दोन हंगामात ५००हून अधिक धावा केल्या. याआधी ऋतुराजने २०२१ साली अशी कामगिरी केली होती. दिल्लीविरुद्ध चेन्नईच्या सलामीवीरांनी देखील कमाल केली. डेव्हॉन कॉन्वे आणि ऋतुराज गायकवाड यांनी पहिल्या विकेटसाठी १४१ धावा केल्या. चेन्नईकडून सर्वाधिक वेळा शतकी भागिदारीचा विक्रम या दोघांच्या नावावर झाला आहे. कॉन्वे-गायकवाड यांनी चौथ्यांदा शतकी भागिदारी केली. याआधी सुरेश रैना आणि मायक हसी यांनी ३ वेळा अशी कामगिरी केली होती. मध्ये दिल्ली कॅपिटल्सची कामगिरी चांगली झाली नाही. पण कर्णधार वॉर्नरने मोठा विक्रम स्वत:च्या नावावर केली. आयपीएलच्या इतिहासात वॉर्नरने सर्वाधिक ७ वेळा ५००हून अधिक धावा करण्याचा विक्रम केला.
