म. टा. प्रतिनिधी, पुणे : प्रभात रस्त्यावर काम करणाऱ्या ठेकेदाराची अडवणूक करणाऱ्या डेक्कन पोलिस ठाण्यातील दोन पोलिस कर्मचाऱ्यांना निलंबित करण्यात आले आहे. शिपाई निखिल शेडगे आणि आकीब सत्तार शेख अशी पोलिस कर्मचाऱ्यांची नावे आहेत. पोलिस उपायुक्त संदीपसिंह गिल यांनी याबाबतचा आदेश दिला आहे.काय प्रकरण?गेल्या महिन्यात पोलिस कर्मचारी शेडगे आणि शेख रात्रपाळीत गस्त घालत होते. प्रभात रस्त्यावर मध्यरात्री एकच्या सुमारास ठेकेदाराकडून रस्त्याचे काम करण्यात येत होते. शेडगे आणि शेख यांनी ठेकेदाराला अडवले. तुमच्याकडे मध्यरात्री काम करण्याची परवानगी आणि कार्य निविदा आहे का, अशी विचारणा केली. ‘रस्त्यात खडी पडली आहे. गाड्या घसरतील,’ असे दोघांनी ठेकेदाराला सांगितले. ‘खडी बाजूला काढतो,’ असे सांगून ठेकेदाराने त्यांना निविदा दाखविली. त्या वेळी शेडगे आणि शेख प्रभात रस्त्यावरील एका हॉटेलमध्ये गेले. तेथील एका कामगाराच्या मोबाइलवरून त्यांनी पोलिस नियंत्रण कक्षाशी संपर्क साधला. त्यानंतर ठेकेदाराला मध्यरात्री डेक्कन जिमखाना पोलिस ठाण्यात नेण्यात आले.चौकशीत शेडगे, शेख दोषीघडलेल्या प्रकारानंतर ठेकेदाराने वरिष्ठ पोलिस अधिकाऱ्यांकडे तक्रार दिली. वरिष्ठ अधिकाऱ्यांनी पोलिस नियंत्रण कक्षाला आलेल्या दूरध्वनीची चौकशी केली. तेव्हा दूरध्वनी एका हॉटेल कामगाराच्या नावावर असल्याचे आढळून आले. हॉटेल कामगाराची चौकशी केली तेव्हा त्याने शेडगे आणि शेख यांनी तक्रार दिल्याचे सांगितले. चौकशीमध्ये शेडगे आणि शेख दोषी आढळून आले. पोलिस दलाची प्रतिमा मलिन करणे; तसेच बेजबाबदार वर्तनासाठी दोघांना पोलिस दलातून निलंबित करण्यात आल्याचे परिमंडळ एकचे पोलिस उपायुक्त गिल यांनी आदेशात म्हटले आहे.
