म. टा. प्रतिनिधी, नाशिक : तत्कालीन पोलिस अधीक्षकांसह माजी पालकमंत्र्यांशी ‘विशेष’ जवळीक असलेला ‘आरोग्यदूत’ तुषार जगताप याला नाशिक ग्रामीण पोलिसांनी अटक केली आहे. महिनाभरापूर्वी इगतपुरीत सव्वा कोटी रुपयांचा गुटखा हस्तगत केल्याच्या गुन्ह्यातील तपासात जगतापचे ‘नेटवर्क’ उघड झाले आहे. मुख्य सूत्रधार राज भाटिया याच्यासमवेत जगताप हा राज्यभरात अवैधरीत्या गुटखा विक्रीत ‘किंग’ म्हणून सक्रिय असल्याचे समोर येत आहे.२६ मे २०२३ रोजी इगतपुरी पोलिस ठाण्याच्या पथकाने मुंबई-आग्रा महामार्गावर दोन कंटेनर भरून सव्वा कोटींचा अवैध गुटखा हस्तगत केला होता. याप्रकरणात फरार असलेला मुख्य संशयित राज किशनकुमार भाटिया (वय ३८, रा. जयपूर, राजस्थान) याला पोलिसांनी २३ जून रोजी अटक केली. जयपूरमधून भाटियाला अटक केल्यावर त्याने जबाबात संशयित तुषार कैलास जगताप (वय ३६, रा. त्रिमूर्तीनगर, नाशिक) याचे नाव उघड केले. त्यानुसार पोलिसांनी जगतापला अटक केली आहे. दरम्यान, संशयित भाटिया हा दिल्ली व जयपूरमधून सूत्रे हलवून बंद कंटेनरमध्ये देशातील विविध राज्यांत गुटख्याची तस्करी करायचा. दोन ते तीन वर्षांपासून भाटिया पोलिसांच्या हाती तुरी देत होता. सन २०२१ पासून नाशिकचा जगताप हा भाटियाच्या संपर्कात आला. त्याने महाराष्ट्रातील ‘गुटख्याचे नेटवर्क’ हातात घेत तस्करीमध्ये ‘एंट्री’ घेतली. संशयित जगताप हा त्याच्या साथीदारांसह परराज्यातही तस्करी करीत असल्याची माहिती समोर येत आहे. भाटियासह जगताप हे दोन ‘बडे मासे’ गळाला लागल्याने अवैध गुटखा विक्री व पुरवठ्याच्या मुळाशी जाणे पोलिसांना शक्य होणार आहे. याप्रकरणी सखोल तपासाचे निर्देश पोलिस निरीक्षक राजू सुर्वे यांना देण्यात आले आहेत.कोण आहे ‘आरोग्यदूत’ जगताप?तुषार जगताप हा ‘आरोग्यदूत’ म्हणून नाशिककरांना परिचित होता. तत्कालीन पालकमंत्री गिरीश महाजन व तत्कालीन पोलिस अधीक्षक सचिन पाटील यांच्याशी त्याची ‘विशेष’ जवळीक होती. तत्कालीन अधीक्षकांसमवेत तो प्रत्येक ठिकाणी वावरायचा. त्यामुळे अनेक ‘बड्या’ लोकांशी त्याचा संपर्क वाढला. त्यातून त्याने कित्येकांशी जवळीक साधली. तत्पूर्वी, मराठा क्रांती मोर्चाच्या आंदोलनातही तो सक्रिय होता. करोना काळातही त्याने समाजकार्य करून प्रसिद्धी मिळवली. करोना काळात केलेल्या कामामुळे 'आरोग्यदूत म्हणून परिचित झाला होता. त्यातून एक ‘वेब न्यूज पोर्टल’ही त्याने चालवण्यास सुरुवात केली. त्याने शहरातल्या अनेकांना गंडा घातल्याची काही दिवसांपासून चर्चा आहे. गुटखा तस्करीच्या गुन्ह्यातील सखोल तपासात त्याचे इतर ‘उद्योग’ समोर येण्याची शक्यता आहे.
