: आमच्या साहेबांना आंबे आवडतात, तुझ्या टोपलीतील सर्व आंबे साहेब विकता घेतील, अशी थाप मारत एकाने आंबे विक्री करणाऱ्या महिलेला मोटरसायकलवर बसवून झाल्टा फाट्यावर नेत लुटल्याचा प्रकार समोर आला आहे. या प्रकरणी महिलेच्या फिर्यादीवरून सिडको एमआयडीसी पोलिस ठाण्यात गुन्हा दाखल करण्यात आला आहे.सिडको एमआयडीसी पोलिस ठाण्यात महिलेने दिलेल्या तक्रारीनुसार, ८ जून रोजी सायंकाळी पाच वाजेच्या सुमारास ती शेंद्रा एमआयडीसी भागातील टाकळी रोडवरील पेट्रोल पंपाच्या कच्च्या रस्त्याने डोक्यावर टोपली घेऊन आंबे घेऊन जात होती. एक ३५ वर्षाचा अनोळखी इसम मोटरसायकल वर बसून तिथे आला. 'माझ्या साहेबांना गावरान आंबे खूप आवडतात, तू आंब्याचे टोपले घेऊन माझ्या गाडीवर बस. मी तुला साहेबांकडे घेऊन जातो. तुझे सगळे आंबे विकत घेतील,' अशी थाप मारली. आरोपीवर विश्वास ठेवून महिला मोटरसायकलवर बसली.दुचाकीस्वारांनी महिलेला झाल्टा फाट्यावर गेल्यावर दुचाकी थांबविली. तुझ्या गळयातील मंगळसूत्र कानातील टॉप्स व हातातील चांदीच्या पाटल्या काढ नाही तर तुझा जीव घेऊन अशी धमकी दिली. या महिलेच्या गळयातील २५ हजार रुपये किंमतीचे मंगळसूत्र, ५० हजार रुपयाचे कानातील टॉप्स, १० हजार रुपये किमतीच्या चांदीच्या दोन पाटल्या तर ४ हजार रुपये रोख असा एकूण ८९ हजार रुपये किंमतीचा मुद्देमाल आरोपीने लंपास केला. या प्रकरणी सिडको एमआयडीसी पोलिस पुढील तपास सपोनि शिवाजी चौरे करीत आहेत.
