पुणे: पतीचे निधन झाल्यानंतर प्रियकरासोबत 'लिव्ह इन'मध्ये राहणाऱ्या महिलेच्या दोन अल्पवयीन मुलींवर प्रियकराने अत्याचार केल्याचा धक्कादायक प्रकार समोर आला आहे. या दोन्ही मुलींची व्यवस्था एका सामाजिक प्रकल्पात करण्यात आली होती. मुलींनी त्यांच्यासोबत घडलेली घटना प्रकल्पातील प्रमुख महिलेला सांगितल्यानंतर सर्व प्रकार उघडकीस आला.या प्रकरणी सामाजिक प्रकल्पातील महिलेने दिलेल्या तक्रारीवरून जनता वसाहत येथे राहणाऱ्या व्यक्तीवर गुन्हा दाखल करण्यात आला आहे. हा प्रकार २३ एप्रिल २०२३ ते नऊ मे २०२३ या कालावधीत घडला आहे. पोलिसांनी दिलेल्या माहितीनुसार, एक महिला पतीच्या निधनानंतर १२ आणि नऊ वर्षांच्या मुलींसह तिच्या प्रियकरासोबत राहत होती. त्या मुली महिलेच्या प्रियकराला पप्पाच म्हणत असत. दोन वर्षांपूर्वी त्यांच्या आईचे आणि आरोपीचे भांडण झाले होते. त्या वेळी मुलींची आई घरातून निघून गेली. त्यानंतर आरोपीने १२ वर्षांच्या मुलीसोबत अश्लील कृत्य केले होते. दरम्यान, यानंतर मुलींची रवानगी एका सामाजिक प्रकल्पात करण्यात आली. तेथे नऊ वर्षाच्या मुलीने देखील तिच्यासोबत घडलेल्या अश्लील प्रकाराची माहिती दिली. त्यानंतर पोलिसात तक्रार देण्यात आली होती.
