सांगली: मागील काही दिवसांपासून राज्यातील राजकारण चांगलेच पेटलेले पाहायला मिळत आहे. शिंदे- फडणवीस सरकारशी हात मिळवणी करत सरकारमध्ये सामील झाल्याने राष्ट्रवादी काँग्रेस पक्षात उभी फूट पडली आहे. राज्यपातळीवरील फूट आता स्थानिक पातळीवर देखील पडल्याचे पाहायला मिळत आहे. आजित पवार गट आणि गटांच्या कार्यकर्त्यांमध्ये पक्ष कार्यालयावरून वाद होत आहेत. असाच प्रकार सांगलीत देखील घडला. झालं असं की, उपमुख्यमंत्री अजितदादा पवार यांचा फोटो महापौर कार्यालयात लावण्यावरून महापौर दिग्विजय सूर्यवंशी व उपमुख्यमंत्री अजित पवार समर्थक असलंले नगरसेवक अतहर नायकवडी यांच्यात शाब्दिक वाद झाला. महापौरांना भेट दिलेला अजित पवारांचा फोटो महापौरांनी कार्यालयात न लावल्याने स्वत: नायकवडी यांनी जबरदस्ती करत कार्यालयात फोटो लावला. याप्रकारामुळे संतप्त झालेल्या महापौरांनी नायकवडी यांना स्टंटबाजी करू नका असे सुनावले. तसेच काही क्षणातच उपमुख्यमंत्री अजित पवार यांचा फोटो महापौर कार्यालयातून उतरवण्यात आला. राज्यात राष्ट्रवादीमध्ये फूट पडल्यानंतर उपमुख्यमंत्री अजित पवार यांच्यासह तीसहून अधिक आमदारांनी शिंदे-फडणवीस सरकारला पाठिंबा दिला. अजित पवार गटाला नऊ मंत्रीपदे देखील मिळाली आहेत. त्यामुळे राज्यात सध्या शरद पवार विरूध्द अजित पवार असा संघर्ष सुरू झाला आहे. या संघर्षाचे पडसाद आता सांगली महापालिकेत उमटू लागले आहेत. अजित पवार समर्थक, नगरसेवक अतहर नायकवडी यांनी महापौर दिग्विजय सूर्यवंशी यांना अजित पवार यांचा फोटो भेट दिला. महापौर कार्यालयात हा फोटो लावावा अशी मागणी त्यांनी महापौरांकडे केली. महापौर सूर्यवंशी यांनी कर्मचारी बोलावून सायंकाळी फोटो लावून घेऊ, अशी ग्वाही दिली. मात्र नायकवडी यांनी महापौरांचे ऐकले नाही. त्यांनी सोबत असलेल्या कार्यकर्त्यांकडून कार्यालयात फोटो लावला. यामुळे महापौर संतप्त झाले. तुमचा फोटो मी स्वीकारला आहे, मी मनपा कर्मचार्यांकडून हा फोटो लावून घेतो, असे सांगितले असताना तुम्ही स्टंटबाजी करू नका असे म्हणत महापौरांनी नायकवडी यांना सुनावले. त्यानंतर नायकवडी कार्यालयात सोडून गेले. क्षणातच महापौर सूर्यवंशी यांनी अजितदादांचा फोटो काढून ठेवला. या घटनेची चर्चा मात्र महापालिकेत चांगलीच रंगली होती.
