म. टा. विशेष प्रतिनिधी, मुंबई: विद्याविहार रेल्वे स्थानक येथे मुंबई महापालिकेच्या वतीने बांधण्यात येत असलेल्या उड्डाणपुलाच्या पर्यवेक्षणाचे काम आणि गर्डरचे वजन ६०० मेट्रिक टनने वाढल्याने सल्लागार मे. राइट्स लिमिटेड कंपनीच्या सल्लागार शुल्कातही वाढ झाली आहे. ही सल्लागार शुल्कवाढ तब्बल दोन कोटी ५३ लाख रुपयांची आहे. त्यामुळे सल्लागाराचे मूळ दोन कोटी १० लाख असलेले शुल्क आता चार कोटी ६३ लाखांवर पोहोचले आहे.विद्याविहार स्थानकाजवळ पूर्वेकडील रामचंद्र चेंबूरकर आणि पश्चिमेकडील लालबहादूर शास्त्री मार्ग यांना जोडण्यासाठी नवा उड्डाणपूल बांधण्यात येत आहे. हा पूल १२.५ मीटर रुंद आणि १०० मीटर (३२८ फूट) लांबीचा असणार आहे. केवळ दोन पिलरवर तो सलग बांधण्यात येणार आहे. अशा प्रकारचा पहिलाच प्रयोग मुंबईत केला जात आहे. लांबीमुळे हा पूल आशियातील सर्वांत मोठा पूल ठरणार आहे. यासाठी स्टेनलेस स्टिलचा वापर करण्यात आला आहे. पुलाची बांधणी जागेवरच सुरू असून त्याचे आवश्यक भाग तयार करण्यात आले आहेत. नोव्हेंबर २०२३मध्ये पुलाचा दुसरा गर्डर बसवण्यात आला.या पुलाच्या कामासाठी ९ डिसेंबर २०२० ते ८ डिसेंबर २०२१ या कालावधीसाठी २०१८मध्ये मे. राइट्स लिमिटेड कंपनीची सल्लागार म्हणून नियुक्ती करण्यात आली आहे. दरम्यान करोना प्रादुर्भावामुळे रेल्वे प्रशासनामार्फत पूलबांधणीस आवश्यक परवानग्या मिळण्यास विलंब झाला. त्यामुळे, तसेच रेल्वे प्रशासनाकडून रेल्वे रुळांवर बसविण्यात येणाऱ्या गर्डरच्या आराखड्यात वेळोवेळी झालेल्या बदलानुसार आराखड्याच्या अंतिम मंजुरीस विलंब झाला. त्यामुळे मे. राइट्स यांचा सेवा पुरविण्याचा कालावधी आधी ९ डिसेंबर २०२१ ते ८ डिसेंबर २०२२ आणि दुसऱ्यांदा ९ डिसेंबर २०२२ ते ३० नोव्हेंबरपर्यंत वाढवण्यात आला आहे.आधी निश्चित केल्यानुसार गर्डरचे वजन दीड हजार मेट्रिक टन होते, ते दोन हजार १०० मेट्रिक टन झाले. म्हणजे गर्डरचे वजन ६०० मेट्रिक टनने वाढले आहे. त्यामुळे मे. राइट्स यांच्याशी करण्यात आलेल्या करारानुसार त्यांना द्यावयाचे कार्यस्थळावरील कामाचे २१ महिने २३ दिवसांचे पर्यवेक्षण शुल्क व गर्डरच्या अतिरिक्त वाढलेल्या वजनासाठी फेब्रिकेशनच्या कामाचे पर्यवेक्षण शुल्क वाढवून द्यावे लागले आहे, असे पालिकेने याबाबतच्या प्रस्तावात म्हटले आहे.असा आहे उड्डाणपूल...- लालबहादूर शास्त्री मार्ग व रामचंद्र चेंबूरकर मार्ग यांना जोडणारा दोन मार्गिकांचा उड्डाणपूल.- एकूण ६५० मीटर लांबीच्या या प्रकल्पात रेल्वे रुळांवर १०० मीटर पूल, तर पूर्व बाजूस २२० मीटर आणि पश्चिम बाजूला ३३० मीटर पोहोचमार्ग.- रेल्वे रुळांच्या वर असलेल्या पुलाची रुंदी २४.३० मीटर राहणार आहे. यात दोन्ही बाजूंना प्रत्येकी दोन मीटरचे पदपथ समाविष्ट.- पुलाचा पोहोचमार्ग हा एकूण १७.५० मीटर रुंदीचा असेल. त्यात दोन्ही बाजूंना प्रत्येकी एक मीटरचा पदपथ असेल.- उड्डाणपुलाचा अंदाजित खर्च सुमारे १७८ कोटी रुपये.- रेल्वे रुळांवरील मुख्य उड्डाणपुलाचा खर्च सुमारे १०० कोटी, तर पोहोचमार्ग आणि इतर कामे मिळून ७८ कोटी रुपये आहे.
