म. टा. प्रतिनिधी, मुंबई : उन्हाळी सुट्ट्यांमुळे गावी तसेच पर्यटनासाठी जाणाऱ्या प्रवाशांची संख्या वाढू लागल्याने राज्य परिवहन (एसटी) महामंडळाने राज्यात एक हजार ८८ विशेष बसगाड्या चालवण्याचा निर्णय घेतला आहे. राज्यातील शाळांना सुट्टी लागल्यानंतर, विद्यार्थी वाहतुकीसाठीच्या बस उपलब्ध झाल्याने त्यातून प्रवासी वाहतूक करून गर्दीचे व्यवस्थापन करण्याचे नियोजन महामंडळाने केले आहे.राज्यातील सर्वाधिक गर्दीचे मार्ग आणि प्रादेशिक स्तरावरील प्रवासी मागणी यांनुसार विशेष गाड्या चालवण्यात येणार आहेत. गर्दीच्या मार्गांवर मध्यवर्ती कार्यालयांकडून ४९६ बसगाड्या चालवण्यात येणार आहेत. मुंबई प्रदेशातून २११, पुणे ३३२, छत्रपती संभाजीनगर २४९, नाशिक १९९, अमरावती ५१ आणि नागपूर प्रदेशातून ४६ विशेष गाड्या धावणार आहेत. प्रत्येक विशेष गाडी सरासरी ४५० किलोमीटर अंतर कापणार आहेत. यामुळे सुमारे पाच लाख किलोमीटरची प्रवासी वाहतूक करण्याचे महामंडळाचे नियोजन आहे, असे वाहतूक विभागातील वरिष्ठ अधिकाऱ्यांनी सांगितले.एसटी महामंडळाच्या साध्या आणि परिवर्तन श्रेणीतील बसमधून विद्यार्थी वाहतूक केली जाते. उन्हाळ्यात शाळांना सुट्टी असते. त्यामुळे या बस प्रवासी वाहतुकीसाठी वापरण्यात येत आहेत. उन्हाळ्यात विद्यार्थी वाहतूक होत नसल्याने जवळपास एक हजार ४०० ते एक हजार ५०० एसटी बस अतिरिक्त प्रवासी वाहतुकीसाठी उपलब्ध झाल्या आहेत. यामुळे यंदाच्या उन्हाळी सुट्टीत १५ हजार ५०० बसगाड्यांमधून प्रवासी वाहतूक होणार आहेत.
