मुंबई: 'बॉलिवूड क्वीन' कंगना राणावतच्या आगामी 'जजमेंटल है क्या' या चित्रपटाच्या नावावर टीका करणारी अभिनेत्री दीपिका पादूकोन हिच्यावर कंगनाची बहीण हिनं जोरदार हल्ला चढवला आहे. 'कंगनाला मानसिक आजाराचं नाटक करता आलं नाही. त्याऐवजी तिनं मानसिक आजार व त्यासंबंधीच्या पूर्वग्रहांवर भाष्य करणाऱ्या चित्रपटात प्रामाणिकपणे भूमिका केलीय,' असा सणसणीत टोला रंगोलीनं दीपिकाला हाणला आहे. बॉलिवूडमध्ये पदार्पण केल्यानंतर सुरुवातीच्या काळात दीपिका पादूकोनला मानसिक आजाराचा सामना करावा लागला होता. त्यामुळं ती या आजाराबाबत खूप जागरूक असून वेगवेगळ्या व्यासपीठांवरून ती आपले अनुभव शेअर करत असते. अलीकडेच दिलेल्या एका मुलाखतीत तिनं या आजारावर बोलताना 'जममेंटल है क्या' चित्रपटाचा उल्लेख केला होता. या चित्रपटाचं नाव आधी 'मेंटल है क्या' असं होतं. त्यावरून वाद झाल्यानंतर ते बदलण्यात आलं. दीपिकानंही याचा दाखला देत चित्रपटाच्या नावावर नाराजी व्यक्त केली होती. 'आपल्याकडं अशा शीर्षकांचे चित्रपट बनतात. त्यांची पोस्टरही विशिष्ट पद्धतीची असतात. खरंतर असं काही करताना आपण खूप संवेदनशील असायला हवं,' असं तिनं म्हटलं होतं. 'मानसिक आजाराबद्दलचे अपसमज खोडून काढण्याचा प्रयत्न आम्ही करतो आहोत आणि ते लोक त्याला ठराविक साच्यामध्ये कोंबण्याचा प्रयत्न करताहेत, असं तिनं म्हटलं होतं. या वक्तव्यामुळं दुखावलेल्या रंगोलीनं ट्विटरच्या माध्यमातून दीपिकाला उपरोधिक शब्दांत सुनावलं आहे. 'कंगनानं मानसिक आजारांवर चित्रपट बनवून एक स्तुत्य प्रयत्न केला आहे. मात्र, काही लोकांना तेही खटकतंय. 'मेंटल' हा शब्द कलंक वाटू नये. हा शब्द सहज घेतला जावा, असंच कंगनाला वाटतं, असं रंगोलीनं म्हटलं आहे. दीपिकाच्या नैराश्याच्या आजारपणाला तिनं नौटंकी म्हटलं आहे. 'कंगनाला हे नैराश्याचं नाटक करणं कधी जमलं नाही. तिनं कधी अभिनेत्यांची उणीदुणी मीडियासमोर काढली नाहीत,' असं तिनं म्हटलं आहे. 'कंगना खरोखरच अज्ञानी आहे. तिला लोकांना आणि मीडियाला बोटावर नाचवणं जमलं नाही. ती प्रामाणिकपणे स्वत:चं काम करतेय. तिच्याएवढं मूर्ख दुसरं कोण असेल?, तिची खिल्ली उडवणारे मात्र त्यांचा खेळ खेळतच आहेत,' असा चिमटाही रंगोलीनं काढला आहे.
