पुणे टाइम्स टीम निर्माते मधू मंतेना आणि दिग्दर्शिक नितेश तिवारी यांनी जेव्हापासून त्यांच्या ‘रामायण’ या चित्रपटाची घोषणा केली आहे, तेव्हापासून या चित्रपटात कोण काम करणार याच्या सतत चर्चा सुरू आहेत. या भव्यदिव्य चित्रपटात काम मिळावं, म्हणून अनेक कलाकार प्रयत्नशील आहेत. त्यातलीच दोन नावं आहेत, अभिनेत्री दीपिका पदुकोण आणि . या बिग बजेट चित्रपटात सीतेची भूमिका साकारण्यासाठी या दोघींच्या नावाचा विचार होत असल्याचं कळतंय. त्यामुळे या दोघींपैकी सीता कोण साकारणार याची उत्सुकता आहे. या चित्रपटात भगवान राम यांची भूमिका अभिनेता हृतिक रोशन साकारणार असल्याचं बोललं जात होतं. मात्र, या चर्चेवर हृतिकनं काहीच भाष्य केलेलं नाही. त्याचवेळी सीतामातेच्या भूमिकेसाठी दीपिका पदुकोण हे नाव समोर आलं. काही दिवसांनी ही भूमिका श्रद्धा कपूरकडे गेल्याची चर्चा सुरू झाली. त्यातच श्रद्धानं या भूमिकेसाठी रणबीर कपूर आणि अजय देवगण यांच्यासोबतचा आगामी चित्रपट सोडल्यानं या चर्चेला आणखी उधाण आलं. पुढे आपल्याला या भूमिकेसाठी विचारणाच झाली नाही, असंही ती म्हणाल्यानं खरं काय आणि अफवा काय, अशा संभ्रमात या दोघींचेही चाहते पडले. या चित्रपटाच्या कथेवर तीन भागांमध्ये काम सुरू आहे. ते पूर्ण झाल्यानंतरच कलाकारांची निवड आणि नावं जाहीर केली जातील, असं स्पष्टीकरण निर्मात्यांनी दिलं आहे. हृतिकनं चित्रपट करण्यात रस दाखवला आहे, मात्र इतर कलाकारांची नावं निश्चित झालेली नाहीत. निर्मात्यंकडून आलेल्या या स्पष्टीकरणानंतरही आता या चित्रपटात अभिनेता प्रभास रावणाची भूमिका साकारणार असल्याची आणि त्यासाठी त्याला भरभक्कम मानधन दिलं जाणार असल्याची चर्चा आहे. अधिकृत घोषणा होईपर्यंत चाहत्यांना वाट पाहावी लागणार आहे.
