गाझियाबाद: उत्तर प्रदेशच्या गाझियाबादमधील तुलसी निकेतनमध्ये राहणाऱ्या तरुणीची बुधवारी रात्री एका तरुणाने भरबाजारात चाकू भोसकून निर्घृण हत्या केली. मारेकरी तरुण शेरखान घटनास्थळावरून फरार झाला आहे. पोलिसांनी त्याच्या दोन साथीदारांना अटक केली आहे. हे दोघांचाही या हत्येत सहभाग होता. आरोपी शेरखान नैना नावाच्या या तरुणीच्या कुटुंबांना बऱ्याच दिवसांपासून धमकावत होता. फरार झालेल्या शेरखानबद्दल माहिती अथवा त्याला पकडून देणाऱ्या व्यक्तीला २० हजार रुपयांचे बक्षिस दिले जाईल, असं पोलिसांनी जाहीर केलं आहे. आरोपी शेरखान (वय २२) हा दिल्लीच्या सुंदरनगरीमध्ये राहतो. पोलिसांच्या माहितीनुसार, तरुणीचे वडील तुलसी निकेतनमधील बलदेव सिंह विवेक विहारमध्ये एका कारखान्यात नोकरी करतात. १९ वर्षीय नैना दिल्लीत नर्सिंगचा कोर्स करत होती. बुधवारी रात्री ती आपल्या आईवडिलांसोबत एका मोबाइल दुकानात गेली होती. त्याचवेळी एका चेहरा झाकलेल्या तरुणाने नैनाला धक्का मारला आणि तिला खाली पाडले. त्यानंतर तिच्यावर चाकूने सपासप वार केले, अशी माहिती तिचा मामेभाऊ राज याने दिली. आरोपी नैनावर चाकूने वार करत असताना पाहून तिच्या आईवडिलांनी मारेकऱ्याला जोरदार प्रतिकार केला. मारेकऱ्याने नैनाच्या आईवरही वार करण्याचा प्रयत्न केला. मात्र, न घाबरता तिच्या आईने त्याला विरोध केला. त्यानंतर आरोपी घटनास्थळावरून पसार झाला. घटनास्थळावर बघ्यांची गर्दी जमली होती. मात्र, कुणीही त्यांच्या मदतीसाठी पुढे आले नाही. आरोपी आणि त्याचे दोन साथीदार काही दिवसांपूर्वी तिच्या घरी गेले होते. आरोपीचा कपड्यांचा व्यवसाय आहे. आठवडाभरापूर्वीच त्याने घरी येऊन लग्नासाठी विचारणा केली होती. मात्र, नकार दिल्याने त्याने धमकावले होते, अशी माहिती नैनाच्या आईने दिली.
